Ilisimatusarneq: Qaqqat sisoorujussuarneri ukiuni 100-ni arfineq-pingasut
Kalaallit Nunaanni ukiut 100-t kingulliit ingerlaneranni qaqqat arfineq-pingasoriarlutik annertuumik sisoorsimapput. Taakkua sioqqullugit sisoortoqarsimanngilaq. Silap pissusiata allanngoriartornera ilutigalugu qaqqat suli allat annertunerugunartullu sisoornissaat ilimanartut misissuinerup nutaap takutippaa.
Kalaallit Nunaata sineriaani nunap ilaanik qaqqanillu misissuinerup takutippaa ukiut 100-t ingerlanerini sumiiffinni arfineq-pingasuni qaqqat sisoorsimasut.
Nunallu ilaanik misissueqqissaarnerit, toqqorsivimmit assit ukiullu 100-t matuma ilisimasassarsiortut nalunaarusiaat kingumut misissoraanni qaqqat sisoorsimasut amerlassusaat 0-lumiippoq.
Kalaallit Nunaanni qaqqat sisoortarneri nutaanerusut qangalu pisut misissuiffigereerlugit ujarassiooq ilisimatusartuunerlu GEUS-imeersoq Kristian Svennevig taama inerniliivoq.
- Nunap ilaanik, assitoqqanillu 1000-ilippassuarnik ilisimasassarsiortullu nalunaarusiaannik misissueqqissaarninni tupaallaatiginerpaasara tassaavoq: Ukiut 100-t matuma siorna qaqqanik sisoortoqarujussuartarsimanngimmat, Kristian Svennevig videnskab.dk’ Forskerzonemi allappoq.
Najuulluni misissuineq, assinik toqqorsivimmiittunik sumiiffinnilu ilisimasanik katersuinermit paasinarsivoq ukiuni 100-ni kingullerni qaqqat annertuumik sisoorsimasut katillugit arfineq-pingasuusut.
Qaqqat qeriuaannartut nerumikkiartortut
Silap pissusiata allanngoriartornera maanna misigineqartillugu paasisat tupaallannanngitsut ilisimatusartuuneq oqarpoq.
- Qaqqat kissassusaat aalerfiata nalaanniitsillugit, qeriuaannartut ukiuni 1000-ilikkaanni sumiiffinni sivingasuni cementitut issimasut, nerumikkiartulersarput, qaqqallu arriitsumik nikikkiartulersarlutik, ilisimatusartuuneq allappoq.
Taama ineriartorneq qaqqanik annertuumik sisoortoqaqqinneranik, soorlu Karrat kangerluani 2017-imi pisutut inuit sisamat toqunerannik kinguneqartumik, kinguneqarsinnaavoq.
Kalaallit Nunaanni qaqqap sisoortarnerisa ilisimatusarfigineri aallartisarfianniittut misissuinerlu apeqqutinik akissutisineqanngitsunik aamma pilersitsisoq Kristian Svennevig allappoq. Apeqqutit Kalaallit Nunaanni najugallit qaqqamik annertuumik sisoortoqarneranik aqqusaagaqaqqissanersut, sumi qaqugulu.
Misissuinerit kingulliit GEUS-imit Norges Geotekniske Institutimiit takutippaat Uummannap eqqaani sumiiffiit marluk annertuumik sisooratarsinnaaneranik aarlerinaateqartut. Kalaallit Nunaata kitaani sumiiffiit tallimat ingasanngitsumik annikitsumilluunniit aamma aarlerinaateqartutut naliliiffigineqarput.
