Ilisimatusarneq: Iteqqumut qulinneq qilalukkallu inalugaanik nerineq peqqinnarpat?

Iteqqumut, tassa quumut, qulinneq peqqinnarpa? Aamma qilalukkap inalugai nerissallugit peqqinnarpat?

Ilisimatuut marluk, mikrobiolog Aviaja Lyberth Hauptmann aamma oqaluttuarisaanermik ilisimatooq Inge Seiding Ilisimatusarfimmeersut misissuiniarput.

Misissorniarneqarpoq uumassusillit tappiorannartut avatangiisitsinniissimasut inunnut peqqinnarnersut. Misissuinerit takutippaat meeqqat nunatsinni qimmit qanitaralugit peroriartortut sapigaqalernissamut ilimanaatikinnerusartut.

Ilisimatuut maanna misissorniarpaat miluuffigisaminnut ilanngartuisut aamma uumasuaqqat inuup nappaatinut allanullu illersorsinnaaneruneranut iluaqutaanersut. Paasiniarniarpaallu uumasuaqqat miluuffigisaminnullu ilanngartuisut eqqiluisaarnerup kinguneranit annikinnerulerneranni, sapigaqalernissamut astmaqalernissamullu aarlerinaat annertunerulersimanersoq.

Arctic Hub nittartakkamini taama allappoq.

- Mississuinitta aallarnernerani anguniagaraarput Ikinngutitoqqanik, aallaavissatut ilimanaatilinnik nassaarnissarput, miluuffigisaminnut ilanngartuisunik uumasuaqqanillu inuit inooriaasitoqaanni iluaqusersuutaalluarsimasinnaasunik, Aviaja Lyberth Hauptmann nassuiaavoq nangillunilu:

- Inuit, aqqusaarnikuunngilaat nunaateqarnikkut ineriartorneq arriitsoq, taamaattuminguna soqutiginaatilittut periarfissatsialaasoq ”ikinngutitoqqanik” taama kingoqqiviup eqqiluitsigisup taamannallu inooriaatsimikkut atugartunngitsigisut, nassaassarsiorfiginissaat.

Taassuma oqaatigaa qimmit qimuttut qanitaralugit meeqqat peroriartortut sapigaqalersarnerat annikinnerusoq meeqqanit qimmeqarfiunngitsumi peroriartortunit.

Oqaluttuarisaaneq misissuiffigissavaa

Oqaluttuarisaanermik ilisimatusartup, Inge Seidingip toqqortaatini allaatigineqarsimasut misissorlugit inuit inooriaasiat pillugu misissuissaaq.

Inuit nerisarsimasaat inooriaasiallu annerusumik misissuiffiginiarpaa.

- Apeqquserniarparput, suut inuussutaanni inooriaasaannilu, peqqissuunissaannut iluaqutaasarsimanersut, unikaallalaariarlutalu iluaqutaasimasut pitsaasut uniffigilaarlugit oqallisigitilaassavarput, sunik iluaqutinik inooriaatsimiittoqarsinnaanersoq, imaanngitsoq mutiusariaqartut. Ilisarnartorsiniarniarpugut inooriaatsimi naleqartitaqarnersoq, siornatigulli pigineqareersimasunik, Inge Seiding oqarpoq.