Ilisimatusarneq: Ilisimatoorpassuit nunanit tamalaaneersut nunatsinni katersuupput
Sisimiuni, Sarfannguani, Kangerlussuarmi Nuummilu ulluni makkunani allanertat takussaasut tassaasinnaapput ilisimatuut Greenland Science Weekimi peqataasut. Ilisimatuut taakku USA-mit, Japanimit, Danmarkimit aammalu minnerunngitsumik nunatsinnit ilaatigut aggersuupput taakkulu ilisimatusarnerminnit tusarliussassaqarput.
Tallimanngorneq novembarip pingajuaniit tallimanngorneq novemberip qulingat tikillugu Sisimiuni, Sarfannguani, Kangerlussuarmi Nuummilu inuit silatoorpassuit najuupput, taakku tassaapput ilisimatoorpassuit assigiinngitsorpassuarnik ilisimatusartut.
Taakku ataatsimoorrapput ilisimatusarnerminni suliatik pillugit ilisimatooqatiminnut avitseqatiginnissallutik. Taamaattorli aamma kikkunnulluunniit soqutiginnissinnaasunut ilisimasaminnik avitseqateqarusuttorujussuupput.
Ilisimatuummi, ilisimatusarfigisaminnut itisuumik samminninnermik saniatigut, pikkorissuupput ilisimasaminnik tamanut paasinartumik avitseqatiginnissallutik. Tassunga tunngatillugu innuttaasut soqutigisassarsiorfiginnissinnaapput immikkuullarikkaanut ilisimatusaatigineqartunut paasisaqarnerunissaminnut.
Assersuutigiinnarlugu tallimanngornermi unnukkut Sisimiuni Taseralimmi qularnanngitsumik amerlasuunit soqutigineqartumik aaqqissuussisoqartussaavoq. Tassani ilisimatuut, takornarialerinermik aammalu attaveqaqatigiinnikkut atugassarititaasunik ilisimasaqarluartut naapinneqarsinnaapput. Kangerlussuup siunissami qanittumi nunatta isaavissuatut atorunnaartussaaneranut atatillugu sunniutissat suusinnaaneri aammalu minnerunngitsumik ATV-it aqqusinissaanik sanaartorneq Qeqqata Kommunianut qanoq sunniuteqarsinnaanersoq takornariaqarnermullu qanoq annertoqqutaasinnaanersoq pillugit samminnittoqassaaq.
Tamatuma saniatigut arfininngornermi festivalit marluk Sisimiuni aamma Taseralimmi ingerlanneqassapput. Festivalip aappaa nunarsuarmioqatigiit kingornutassaqarfii pillugit ingerlanneqassaaq aappaalu ilisimatusarneq pillugu ingerlanneqassalluni.
Ivalu Barlach Christensen aamma Eske Willerslev naapikkit
Nuummi naapinneqarsinnaasut ilagaat avataarsualeritooq, astrofysiker Ivalu Barlach Christensen. Taassuma Harvard-imi suleqatini Nimesh Patel peqatigalugu arsarnerit pillugit ilisimatusarnermi paasisat kingullerpaat saqqummiutissamaarpai.
Ilisimatuut taakku marluk sisamanngorneq 9. november unnukkut nalunaaqutaq 18:00 Katuami naapinneqarsinnaapput.
Taamatuttaaq DNA pillugu ilisimatusartut, Eske Willerslev aamma Kurt Kjær naapitassat ilagissavaat. Taakku siulersuagut pillugit ilisimatusarnerminni paasisatik kingulliit saqqummiutissamaarpaat. Saqqummiussassaat soqutigigaanni Ilisimatusarfiup kantiinaanukartoqarsinnaavoq sisamanngornermi 9. november nalunaaqutaq 17:00 aaqqissuussaq aallartittoq peqataaffigiartorlugu.
Aqqissuussat tamaasa UANI qimerloorsinnaavatit (tuluttoorpoq).