Ilisimatusarfiup Ukrainemiut pingasut tikilluaqqugai
Ilinniartitsisoq ilinniartullu marluk – tamarmik Ukrainemeersut – Ilisimatusarfimmut tikeraassapput.
Ilisimatusarfik piffissap sivikitsup iluani Ukraineimi ilisimtusarfik - National University Yuri Kondratyuk Poltava Polytechnic – suleqatiginissaanik isumaqatigiissuteqarfigaa.
Suleqatigiinnissamik isumaqatigiissut tamanna tunngavigalugu ilinniartitsisumik ataatsimik ilinniartunillu marlunnik tikeraartoqassasoq Ilisimatusarfik nittartakkamini nalunaaruteqarpoq.
Ilisimatusarfiup Ukrainemiut tikeraartorinissai, taakku nunaannit Ruslandimit tiguagaasimasunit ungaseqisumut, qilanaaraa:
- Aamma soorlu allareersugut, uagut ilinniarfittut inunnut sorsunnermi annilaanganartorsiornermik ulluinnarsiuteqarsimasunut neqerooruteqangaarsinnaanngilagut.
Ulluinnarnut utertutut
- Ukrainemeersulli pingasut tikeraartussatsitut tikilluaqqunerisigut ulluinnarnut utertutut misigiffigisinnaasaannik toqqissisimanarnerusunik avatangiiseqarallartissinnaassavavut, Ilisimatusarfik allappoq.
Tikeraartussat taakku sisamat apriilip sisamaani tikissapput, augustillu naanissaata tungaanut Ilisimatusarfimmiissallutik. Tikeraat tikilluaqquneqarluassapput ilaatigut poorskikkunni Nuummi takornariartinneqarlutillu Nuup kangerluanut aalisariartinneqassallutik.
Ilinniartitsisoq tikeraartussaq ilaatigut Inuussutissarsiornermi aningaasaqarnermut ilisimatusarnermi ilinniartitseqataajumaarpoq, ilinniartullu marluk ilaatigut Economic development in the Arctic-imi, Economics I-imi aamma Advanced political science-imi pikkorissaqataassapput.