Ilisimatusarfiup ataqqinaammik doktorinngortut pingasut nutaat saqqummiuppai

Ilisimatusarfik tallimanngornermi ukiumoortumik nalliuttorsiutigineqarpoq, nalliuttorsiornermilu ataqqinaammik doktorinngortut pingasut nutaat ilisaritinneqarput.

Pingasut taakku tassaapput; oqaatsinik ilisimatusartoq Carl Christian (Puju) Olsen, professori Marianne Stenbæk aamma ujarassiooq Minik Rosing. Taakku tamarmik suliaminnut piginnaasaqarnerannut aamma tunniusimanerannut tamarmillu nammineq immikkut inuiaqatigiinnut ilisimatusarnermuttaaq tapiissuteqarsimanerannut nersorneqarput, Ilisimatusarfik tusagassiuutinut nalunaarummi allappoq.

Carl Christian (Puju) Olsenip Inuit oqaasiinut tapersiinera immikkuullarissoq - aamma kalaallisut oqaasillit pisinnaatitaaffiisa nukittorsarneranut tunniusimalluinnarnera pillugu Ilisimatusarfimmit ataqqinaammik doktorinngortinneqarpoq:

Ilisimatusartut akornanni attaveqarnermik ataavartumik pilersitsisoq

- Inuunini tamakkerlugu inuit oqaasii pillugit ilisimatusarnermut tunniusimasuuvoq qasusuillunilu inuit piorsarsimassusaanni oqaatsinillu ilisimatusaatitigut kingornussaasa attatiinnarneqarnissaat siuarsarneqarnissaallu pillugit sulisimavoq, Ilisimatusarfik allappoq.

Marianne Stenbæk Montrealimi najugaqarpoq McGill Universitymilu professoriuvoq. Stenbæk ingerlatitseqqiisarnermigut ilisimatusarluni misissuinerup inuiaqatigiillu akornanni ataavartunik attaveqalersitsisimanera, Ilisimatusarfiup erseqqissarpaa - kiisalu Kalaallit Nunaata Canadallu akornanni suleqateqarluarnermigut eqqumiitsuliortunik ilisimatusartunillu attaveqartitsilersimalluni:

- Nammineq oqartussaassuseqarnerup annertusineqarnissaanut piorsarsimassutsikkullu piujuartitsinissaq toraarlugu inuiaqatigiit ineriartornerannut ilisimatusariaasia tapersiisarpoq, tamannalu tunngavigalugu Ilisimatusarfimmi Ataqqinaammik doktorinngortinneqarpoq, tamassumunnga atatillugu maani nunatsinni Issittumittaaq inuiaqatigiit ineriartortinneqarnissaanut ilisimatusarfiup tapersiisarnissaa pingaartitatta ilagaat - tassani piujuartitsineq nunallu inoqqaavisa pisinnaatitaaffii ukkatarineqarlutik, Ilisimatusarfik allappoq.

Ataqqinaammik doktorinngortinneqartut pingajuat tassaavoq ujarassiooq nunani tamalaani ataqqineqartoq, Minik Rosing, taassuma ilisimatusarnerata Nunarsuup aallaqqaammut inerikkiartorneranikqulaajaavoq:

Ph.d.-gradit marluk tunniunneqartut

- Nunarsuup pinngoriartorneranik pissusianillu ilisimatusaatit iluanni immikkuullarilluinnartumik suliniarnera aamma ilisimatusarnermi sammisanik paasiuminaassinnaasartunik paasiuminarsarlugit nassuiaasarnera paasissutissiortarneralu pillugit Minik Rosing Ilisimatusarfimmit ataqqinaammik doktorinngortinneqarpoq, Ilisimatusarfik allappoq.

Ataqqinaammik doktoritut uppernarsaammik pissarsinerisa saniatigut aamma kuultimik saqqarmiuusartaarput.

Ukiumoortumik nalliuttorsiornermi aammattaaq ph.d.-gradinik marlunnik tunniussisoqarpoq:

Christine Ingemann ph.d.-gradimik tunineqarpoq Peqqissaanermik Pinngortitamillu Ilisimatusarfimmi ph.d.-liani una pillugu "Fra manual til praksis: Implementeringsprocessen af forældreforberedelsesprogrammet MANU 0-1 - Et kvalitativt studie i dialog med praksis”.

Anna Maria Andersson ph.d.-gradimik tunineqarpoq Peqqissaanermik Pinngortitamillu Ilisimatusarfimmi ph.d.-liani una pillugu "Investigation of atopic dermatitis in Greenland; distinct genotypes, phenotypes and immunotypes”.