allagartartaarneq

Ilisimatusarfimmut ulloq pingaartoq

Ullumi, februarip 25-ani, Ilisimatusarfimmi ilinniartut 30-it allagartartaarput. Arfinillit kandidatinngorput, 24-illu bachelorinngorlutik

Ilinniartuusimasut nuannaaqisut kandidatit arfinillit bachelorillu 24-it Ilisimatusarfimmi tallimanngornermi allagartartaarput

Ullaap tungaa nalunaaqutaq qulinut Ilimmarfimmi ilaqutaasut, ilisarisimasat, ilinniartut ilinniartitsisullu 200-ut missaanniittut kusarnartunik atisalersorsimallutik katersuupput, allagartartaartunut najuukkiartoqarlutik.

Kiinnat nuannaartut, tulluusimaartut pissangarpasittullu Ilimmarfimmi oqalugiartoqarnerani takussaapput. Tine Pars, Ilisimatusarfimmi rektori, Naalakkersuisoq Steen Lynge, Niels Thomsen, KNI-p siulersuisuini siulitaasoq kisalu ilisimatusarfimmi immikkoortortaqarfinni pisortat oqalugiarpput, tamarmillu minnerusumik annerusumilluunnit assigiimmik oqariartuuteqartut Klaus Georg Hansenip, Ilisimatusarfiut institutsiani pisortap, oqaatigaa.

- Oqalugiartuni ersarippoq ilisimatusartut naammassinerat nuannaarutigineqartoq. Aammali ersarippoq ineriartorneq tamaanga unissanngitsoq ingerlauassasorli oqariartuutigineqartoq, Klaus Georg Hansenip oqarpoq.

Oqalugiutini aamma ersarippoq, maanna allagartartaartut silarsuarmut piviusumut unammillernartumut, ajorsarfiusinnaasumut, nuannersumut ineriartorfiusumullu ikaarsaalersut.

Allagartartaartut ataasiakkaarlutik uppernarsaatitik scenemut qaqillutik aagaangamikkit ersaartaanneqartarput. Takuneqarsinaavorlu nuannaarlutillu tulluusimaartut.

Allagartartaartut uppernarsaatitik tigoreermassuk kandidatinngortuni bachelorinngortunilu angusarinnerpaat nersornaammik tunineqarput.

Lasse Meyer, Inuiaat piorsarsimassusaannullu oqaluttuarisaaneranni kandidatinngortoq, angusarissaarluni agguaqatigiisillugu karakteerimini 9,8-arsimammat Karsten Lyberth-Klausenimit, GA sinnerlugu, 5000 koruuninik nersornaaserneqarpoq.

Sabine Christensen, upperisarsiornermi bachelorinngortoq, agguaqatigiisillugu 11,1-inik karakterilerneqarsimavoq, angusarissaarnerminullu Niels Thomsenimit, KNI sinnerlugu, 5000 koruuninik nersornaaserneqarpoq.

Allagartartaarneq naggaserneqarpoq naammassisut assilitinnerannik, tamatumalu kingorna kalaaliminernik imeruersaatinillu tamanut sassaalliisoqarpoq.

Takukkit: Asserpassuit: Ilimmarfimmi allagartartaartut

Powered by Labrador CMS