Ilisimatusarfimmi Ph.d.-tut allaatigisaq nutaaq
Bonnie Jensen, Ilisimatusarfimmi Inuiaqatigiilerinermik ilisimatusartup ph.d.-mik ilisimatusaatigalugu allaatigisani qaammatip tulliani illersussavaa.
"Meeraallu angerlarsimaffik imaluunniit angerlarsimaffiup avataanut inissinneqarneq? - Kalaallit Nunaanni ulloq unnuarlu angerlarsimaffimmi najugaqartut meeqqat 38-t misigisaannik misissuineq"-mik qulequtserlugu, Bonnie Jensen, Nuummi Ilisimatusarfimmi inuiaqatigiilerinermi ilisimatuunngorniartoq allaatigisaqarsimavoq, illersortussanngorlugulu.
Ilisimatuutut allaatigisaq Ilisimatusarfimmi 7. maj illersorneqassasoq, Ilisimatusarfik nittartakkamini ilisimatitsivoq.
- Neriuutigaara una ilisimatusaatigisimasara nunatsinni meeqqat angerlarsimaffiup avataanut inissinneqartartunut iluaqutaajumaartoq. Meeqqat tusaaneqarnissaat peqataatinneqarnissaallu pisariaqarluinnarpoq, pingaartumik meeqqat qanoq misigisaqarsimanerat pillugu uagut inersimasut oqaloqatigiileraangatta. Aamma meeqqat oqaluttuuppatigut upperinninnissarput pingaaruteqarpoq, Bonnie Jensen Sermitsiaq.AG-mut oqaluttuarpoq.
Jette Rygaard, Charlotte Kroløkke aamma Paul Berger ilisimatusaatitut allaatigisaq nalilersussavaat. Illersuineq Ilisimatusarfiup Facebookiani toqqaannartummik aallakaatinneqassaaq kingornalu Ilisimatusarfiup nittartagaanut aamma ikkunneqarumaarluni.
- Covid-19 pissutigalugu killilersuutit atuuttut malillugit peqataasinnaasut ajuusaarnaraluartumik killeqassapput, ilisimatitsissutigineqarpoq.