Ilisimatusarfimmi lektorip Saammaasseqatigiinnissamut Ataatsimiititaliarsuaq isornartorsiorpaa

Naalakkersuisunut siulittaasuusimasup Aleqa Hammondip Siumumeersup Saammaasseqatigiinnissamut Ataatsimiititaliarsuaq pilersitaraa. Kalaallit Nunaata nunasiaataasimaneranut inuiaqatigiittut kulturikkullu unammillernartitaasa qaqilerneqarnissaat ataatsimiititaliarsuup pilersinneqarnerani kissaatigineqarpoq.

Ataatsimiititaliarsuarmi ilaasortaq oktobarimi tunuarpoq. Siunnertarineqartullu aamma isornartorsiorneqarput. Ilisimatusarfimmi dr. phil. lektori Thorkild Kjærgaard isornartorsiuivoq.

Danmarki utoqqatsertariaqanngilaq
- Saammaasseqatigiinnissamut ataatsimiititaliarsuup pilersinneqarneratigut kalaallit akileraarutikkut akiliisartut namminerlu aamma illaruaatigipput. Helle Thorning-Schmidt ataatsimiititaliarsuarmut attuumassuteqarusunngilaq. Inuiaqatigiinnut ataatsimiititaliarsuaq illaruaataavoq. Danskit utoqqatsissutissaqanngillat aamma saammaasseqateqartariaqanngillat. Atuakkiortup Niviaq Korneliussenip aamma oqaasii atorneqarsinnaapput ukuusut: ’Enough of that post-colonial shit’, Thorkild Kjærgaard kamikposten.dk-mut oqallissaaraluni allappoq.

Kalaallit Nunaata nunasiaataasimanngisaannarneranik siornatigut oqariartuutillip Thorkild Kjærgaardip oqaatigaa Saammaasseqatigiinnissamut Atataatsimiititaliarsuaq 'oqaluttuarisaanikkut eqqortunik tunngaveqanngitsunik pilersinneqarsimasoq'.

- Kielimi isumaqatiginninniartoqarsimanera Kalaallit Nunaannit qujamasuutigineqartariaqarpoq. Tuluit Nunaata Kalaallit Nunaannik tiguaarusunnikuugaluarpoq, Thorkild Kjærgaard nassuiaavoq.

Kalaallit suli iluarusullutik inuupput
- Danmarki 1814-mi piumasani tamaasa pinagit iliuuseqarpoq. Kalaallit Nunaannik aqutsisuulerpoq. Danmarkip suliniuteqarluarnerata kingunerisaanik Kalaallit Nunaat Issittumi nunani maannakkut pissagissaarnerpaavoq, peqqinnersaalluni inuiaqatigiinnilu ingerlalluarnersaalluni. Amerikap nunavissuani Kalaallit Nunaat kisiartaalluni minnerussuteqartutut inissisimasuuvoq. Kalaallit oqaasii nunarsuup avannarpasissortaani nunaqavissut oqaasii nungukkiartunngitsutuaapput, Thorkild Kjærgaard oqarpoq.

- Oqaaserpassuit amerlasuut Columbusi tikimmalli oqaaserineqarunnaarnikuupput. Kalaallit oqaasii suli atorneqarluartuupput. Kalaallisut amerlasuunik atuakkiaqarpoq, kikkut tamarmik atugaraat, innuttaasut kalaallisut oqalupput aamma inatsisiliornerni kalaallisut oqaluttarput. Naalakkersuisoqarfiit allattoqarfianni kalaallisut oqaluttarput, angerlarsimaffinni, aqqusinerni, pisiniarfinni, oqaluffimmi, atuarfimmi eqqartuussivinnilu. Taamaasiorsinnaasimanngikkaanni aatsaat ajornartorsiuteqartoqarsimassaaq, oqaluttuarisaanermik ilisimasalik oqarpoq.