Ilisimatusarfimmi ilinnialersut 196-it

Ilisimatusarfimmi ukioq ilinniarfiusoq nutaaq aallartippoq. Ilinnialerusullutik qinnuteqarsimasut 350-iupput, taakkunanngalu 196-it ilinniarfigerusutaminni aallartillutik. Ilinniartitsisunngorniat siornamit amerlanerusut aamma atualerput.

Ilisimatusarfimmi bacheloritut kandidatitulluunniit ilinniagaqarusullutik 350-it missaat qinnuteqarsimapput. Siorna qinnuteqartut amerlanerupput, Ilisimatusarfimmi ilinnialerusullutik qinnuteqartut 390-iummata.

Ukioq mannali 2018-imut sanilliullugu ilinniagaqarnissamut qinnuteqartut amerlanerugaluartut, taamaattoq siornatut amerlatigisut maanna ilinnialerput.

- Tamassumunnga pissutaanerpaavoq inatsisilerinermik ilinniarneq siorna aallartikkatsigu, tassungalu qinnuteqartorpassuusimapput. Qinnuteqartut amerlangaatsiartut itigartittariaqarsimavagut, ilinniarfimmi inissat killeqarmata. Inatsisilerinermut ilinniarnissamut qinnuteqartut allanut sanilliullugit ukioq manna nalinginnaasutut amerlatigaat, taamaattumillu siornarnit ikileriarsimallutik affaannanngorsimagamik. Ilinniartitsisunngorniarusullutilli qinnuteqartut ukioq manna amerleriarsimapput, tamannalu nuannerpoq, Line Ellemann Høegh, Ilisimatusarfimmi ilinniarfinnut pisortaq Sermitsiaq.AG-mut nassuiaavoq.

Arnat angutillu agguataarneri

Ilisimatusarfimmi ilinnialersuni arnat ukioq manna amerlanerungaatsiaqqipput. Ilinnialersut sisamaagaangata arnat pingasuusarput.

- Ilisimatusarfimmi ilinniarneqarsinnaasuni arnat ilinnialersut amerlanerusarput, kisiannili inuussutissarsiornermi aningaasaqarnermi ilisimatusarnermi, inuiaqatigiilerinermi nutserisunngorniartunilu arnat angutillu amerlaqatigiinnerusarput, erhvervsøkonimimilu siorna aallartittuni angutit amerlanerullutik. Ukioq mannali angutit amerlanerunngillat, Line Ellemann Høegh ilisimatitsivoq.

Ilinniarfinni Ilisimatusarfimmi ilinniarneqarsinnaasuni ilinnialersut ima agguataarsimapput:

  • Peqqissaasut: 11
  • Ilinniartitsisut: 48
  • Inuussutissarsiornermi Aningaasaqarnermi Ilisimatusartut: 28
  • Tusagassiortut: 5
  • Inatsisilerituut: 23
  • Inuiaqatigiilerineq, Bachelor: 18
  • Inuiaqatigiilerineq, Kandidat: 3
  • West Nordic Studies, Kandidat: 6
  • Isumaginninnermi siunnersortit: 18
  • Inuiaat kultooriat oqaluttuarisaanerallu, Bachelor: 13
  • Nutserisut oqalutsillu: 13
  • Oqaasilerineq, atuakkialerineq tusagassiuutilerinerlu, Bachelor: 6
  • Teologi: 4

Piffissaq tamaat ilinnialersut saniatigut ilinniartut aqqanillit fagini ataasiakkaani, tassa inuiaqatigiit kultooriat oqaluttuarisaanerallu, oqaasilerineq, atuakkialerineq tusagassiuutilerinerlu, inuiaqatigiilerinermi aamma inatsisilerinermi aamma ilinnialerput.

Ilisimatusarfik nunanit allaneersunik 15-inik aamma ilinniartoqassaaq. Tassa Frankrigimiit, USA-miit, Ruslandimiit aamma Danmarkimiit ilinniariartortunik tikittoqassagami.

Powered by Labrador CMS