Ilisimatusarfimmi ilinniagaq atorunnaarsinneqassaaq
Oqaasilerinermi, atuakkialerinermi tusagassiutilerinermilu kandidatinngorniartut kalaallisut oqaatsit pillugit ilisimatusarnissamik soqutiginnittut amerlanngillat, soorluttaaq kalaallisut ilinniartitsisut amigaatigineqarlutik.
Ilisimatusarfimmi Oqaasilerinermik, atuakkialerinermik tusagassiutilerinermillu ukiaq manna bacheloritut ilinniagaqalersut, ilinniakkami tassani kingullersaassapput.
Ilisimatusarfik tusagassiorfinnut nalunaarutimini allappoq ilinniarnertuunngorniarfimmi kalaallisut atuartitsisunik kalaallisoortitsisunillu amigaateqarneq annertuneruleriartortoq, soorlu aamma Oqaaserileriffimmi oqaatsinik ineriartortitsinermik suliaqartunik nutserisunillu amigaateqarneq annertuneruleriartortoq.
Oqaasilerinermi, atuakkialerinermi tusagassiutilerinermilu ilinnialersartut ukiut kingulliit ikinnerusimasut, Ilisimatusarfiup naatsorsuusiani takuneqarsinnaavoq. 2011-imi ilinnialersut 23-iupput, ukioq mannali aqqanillit ilinniakkamik aallartitsipput. Ilinnialersut bacheloritut kandidatitulluunniit ilinniakkamik aallartitsisuullutik.
Ilisimatusarfimmit nalilerneqarpoq kalaallisut oqaatsit ukkatarineqaqqullugit ilinniagaq nutaamik aaqqissuunneqartariaqalersoq. Tamanna isumaqarpoq aaqqissuussinerup nalaani, ilinniartunik nutaanik aallartitsisoqassanngikkallartoq.
- Ilinniakkamilli maanna atuuttumik, Oqaasilerinermik, Atuakkialerinermik Tusagassiuutilerinermillu, aaqqissuussinermut tunngatillugu ilinniakkamik aaqqissuussami ukiumi 2023-moortumi ilinnialersussanik akuersinngikkallartoqartariaqassaaq. Taamaattumik aatsaat 2024-mi ilinnialersussanik akuersisaleqqittoqarumaarpoq, ilinnialersullu ilinniakkamik aaqqissuussaq nutaaq malillugu ilinnialerumaarput.
Ilinniagaq nutaaq atuutilersussaaq tassaassaaq Kalaallisut Oqaatsinillu Ilisimatusarneq.
Oqaatsigut pillugit ilisimatusalersut ikippallaarput
Oqaasilernermi, atuakkialerinermi tusagassiutilerinermilu ilinniakkap atorunnaarsillugu allatut ilinniakkamik aaqqissuusseqqittoqarnissaanut tunngavilersuutigineqarpoq oqaatsit kalaallisut pillugit ilisimatusartut soqutiginninnerat appariartormat.
- Oqaasilerinermi, Atuakkialerinermi Tusagassiuutilerinermilu kandidatinngortartut oqaatsinik immikkut sammisaqarniarlutik aalajangertartut ukiorpaalunni ikiliartorsimapput. Tamatuma kinguneranik oqaatsinik ilisimatusarnerup ingerlajuartinnissaa tamatumunngalu atatillugu universitetimi kalaallisut oqaatsini atuakkialerinermilu ilinniartitsineq ajornakusuulersimapput.
Ilinniagaq nutaanngorlugu 2024-imi atuutilissaaq, kalaallisullu oqaatsit ukkatarineqassallutik.
- Ilinniagaq Oqaasilerinermi, Atuakkialerinermi Tusagassiuutilerinermilu ilinniakkanik aaqqissuussami nutaami Kalaallisut Oqaatsinillu Ilisimatusarneq - Grønlandsk & Sprogvidenskab-imik taaguuteqalersussami GUX-imi ilinniartitsisunngorniarfimmilu ilinniartitsisussanik oqaasilerinermi, atuakkialerinermi saniatigullu fagini kulturimut tunngasuni allani suli ilinniartitsiviusassaaq - kalaallisulli oqaatsinik suli aallussinerussallutik, Ilisimatusarfimmit ilisimatitsissutigineqarpoq.
Nutserisutut Oqalutsitullu ilinniagaq aamma nutaanngorsarneqassaaq, ilinniagarlu nutaanngorlugu 2024-imi aamma atuutilersinneqassalluni. Ilinniakkap nutarsarnerani bacheloritut ilinniagaqartut ilinniaqqissinnaanerannik aaqqissuussinerit aamma ukkatarineqassapput.