Ilisimatusarfik: Tiinganiartarneq akuersaanngilarput

Nunami ilinniarfiit qaffasinnerpaartaanni Ilisimatusarfimmi inuit akornanni akuerineqarsinnaananilu akuersaarneqarsinnaanngilaq atoqateqarniarneq siunertaralugu eqqunngitsuliorfigineqartarneq imaluunniit tiingaffigitittarneq. Rektorip Gitte Adler Reimerip tamanna erseqqissaatigaa.

Kinguassiuutitigut innimiilliorntarneq allatulluunniit kinguaassiuutitigut kanngunarsaasarneq Ilisimatusarfimmit akuerineqarsinnaananilu akuersaarneqarsinnaanngilaq. Rektori Gitte Adler Reimer tusagassiorfinnut nalunaaruteqarnermi erseqqissaavcoq.

- Ilisimatusarfittut akisussaafferujussuarmik nammataqarluta ilinniartut sungiusaammik suliffissaanukartittarpavut maani suliffeqarfinni assigiinngitsuni nunanilu allani. Taamaattumik naatsorsuutigijuaannarparput ilinniartut sulisullu pissuserissaartunit naapinneqarsimanissaat, qaqugumulluunniit inoqammut ataqqinnilluni pissuserissaarnissamik pingaartitsisunit, rektori Gitte Adler Reimer oqarpoq.

Suliffimmik sungiusartut tiinganiarfigineqartarsimasut

Taamatut oqaaseqarpoq, Tusagassiuinermi Sulisut Peqatigiiffiata/TP aamma Dansk Journalistforbundip Ilisimatusarfimmut saaffiginnissimanerisa kingorna, tassa rektori ilisimatinneqarsimagami tusagassiortunngorniartuusimasut maannalu tusagassiortunngorniartuusut suliffimmik sungiusarnerminni akulikitsumik tiinganiarfigitittarsimanerannik.

- Suliffeqarfittut ilinniartuutivut sulisuvullu sunilluunniit kanngunarsaasumik pissusilersorfigineqarsimagunik nalunaaruteqartalernissaannik piumasaqarfigisalissavavut. Kanngunarsaasumik pissusilersorfigineqarneq arlatsinnut ajorluinnartumik kinguneqarsinnaavoq, aamma kialluunniit suliffeqarfiit ilaanni taamatut pissusilersorfigineqarnissaq akuersaanngilluinnassavaa, rektori Gitte Adler Reimer oqarpoq.

Ilisimatusarfik tusagassiorfinnut nalunaaruteqarnermi ilisimatitsivoq, Ilisimatusarfimmi immikkoortortanut tamanut nalunaarutigineqarsimasoq, ilinniartut suliffeqarfinnut sungiusaammik suliartortussanngoraangata eqqunngitsuliorfigitissagunik tiingaffigitissagunilluunniit qanoq iliortarnissamik iluamik ilitsersuunneqartassasut.

Siunissami ilinniarnermut atatillugu ilinniarfinni allaneereernermi naliliinermut tamakku ajornartorsiutaasimappata ilanngunneqartalernissaat oqaluuserineqarniarpoq.

Powered by Labrador CMS