Ilisimatusarfik: Bachelorinngortut 54-it kandidatinngortullu marluk avataanit nersorneqartut
Bachelorinngortut 54-it kandidatinngortullu marluk Ilisimatusarfimmi soraarummeersimanerminnut uppernarsaammik tunineqarmata, ilaqutaasut ikinngutaasullu Facebookikkut malinaasariaqarsimapput.
Soraarummeertut allagartartaartinneqarnerat marlunngormat campus Ilimmarfiup kantiinani nalunaaqutaq qulinut pivoq.
Ilinnianerminnik naammassinnittut soraarummeersimanermut allagartaannik tunniussisoqarmat, ilinniakkaminnik naammassinnittut kisimik najuussimapput - tassa takuniaasoqaratik. Ilaqutaasulli ikinngutaasullu ulloq nuannersoq ilimmarfiup Facebookiatigut malinnaasinnaasimapput.
Soraarummeertut allagartartaartinneqareermata ilinniarsimasut tamarmik kaffillerput.
bachelorinngortut 54-it
ilinniartitsisunngortut 35-t
peqqissaasunngortut tallimat
inuiaqatigiilerinermik ilinniarsimasut marluk
inuussutissarsiornermi aningaasaqarnermik ilinniarsimasut qulingiluat
tusagassiortunngortut pingasut
kandidatinngortut marluk
oqaasilerinermik, atuakkialerinermik tusagassiuutilerinermillu ilinniarsimasoq
ataaseq
inuiaqatigiilerinermik ilinniarsimasoq ataaseq
Rektori Gitte Adler Reimers allagartartaartunut oqalugiarami ilaatigut oqaatigai:
- Nunarpassuarni ilisimatusarfippassuit suli matoqqapput, ukiarulu aatsaat
ammariartulissallutik.
- Taamaattumik bachelorinngortortavut kandidatinngortortavullu ullumikkut allagartartaartillugit nalliuttorsiutigisinnaagatsigit assut iluanaartutut misigisimavunga, naak pisarnermit ikinnerulluta allaanerulluinnartumillu nalliuttorsioraluartugut, rektori oqarpoq.