Ilisimatusarfik Sullivinnik Nakkutilliisoqarfimmit peqqussuteqarfigineqarpoq
Ilisimatusarfik sullivimmi isumannaallisaanermi peqqissutsimullu pissutsinik allaganngorlugu naliliinermik suliaqarnissamut, Kalaallit Nunaanni Sullivinnik Nakkutilliisoqarfimmit peqqussuteqarfigineqarpoq. Aqutsisut taarsernerannik tamanna pissuteqarpoq, sulisoqarnermut immikkoortortaqarfimmi pisortaq ilisimatitsivoq.
Ilisimatusarfik peqqussuteqarfigineqarpoq.
Sullivinnik Nakkutilliisoqarfiup 14. decembarimi pulaarsimasup, Ilisimatusarfiup pisortaa Henriette Rosing aamma isumannaallisaanermut sinniisuutitaq Idu Fleischer, oqaloqatigineqarnerisa kingorna tamanna pivoq.
Suliffeqarfiit kattuffiillu tamarmik sulisoqartut akuttunngitsumik APV-mi (sullivimmik nalilersuinermik) allagaqarlutik suliaqartartussaapput. Piumasaqaat taanna Sullivinnik Nakkutilliisoqarfiup nalunaarutaa naapertorlugu Ilisimatusarfiup naammassisimanngilaa, APV nutarterneqarsimanngimmat. Allagaatinik takunnikkumanikkut Sermitsiaq.AG-p pissarsiarisimasaani tamanna atuarneqarsinnaavoq.
- Suliffeqarfik sullivimmi isumannaallisaanermi peqqissutsimullu pissutsit pillugit allakkamik naliliinermik suliaqarnissamik qulakkeerinninnissamut peqquneqarpoq, Sullivinnik Nakkutilliisoqarfik allappoq.
Sullivimmi avatangiisit pitsaanerusut
Sullivimmik naliliineq minnerpaamik ukiut pingasukkaarlugit nutarterneqartartussaavoq.
Sullivimmi avatangiisinik ajornartorsiutit nammineq aaqqittanngitsut, nakkutilliisoqarfik nittartakkamini ilisimatitsivoq, taamaattumillu suliffeqarfiit tamarmik sulisullit sullivimmik naliliinermik suliaqartarnissaat inatsisitigut piumasaqaataavoq. Ilaatigut taanna sullivimmi avatangiisinik ajornartorsiuteqarnersoq qulaajaaqataasarpoq.
- Piffissami 2020-2021-mi ilinniarfinnut (Ilisimatusarfimmi, aaqq.) immikkoortortaqarfinni marlunnik pisortartaarnitsinnik peqqussuteqarfigineqarneq pissuteqarpoq. Suliffeqarfimmi annertuumik allanngortoqaraangat, soorlu immikkoortortaqarfimmi pisortanik taarsiisoqartillugu, taava APV-mik suliaqartartussaalluta paasitinneqarpunga, Charlotte Lund Mølgaard, Ilisimatusarfimmi sulisoqarnermut pisortaq oqarpoq.
Novembarimut immikkut akuersissuteqarneq
Peqqussuteqarneq tunuliaqutigalugu Ilisimatusarfik marsimi APV-mik suliaqarsimasussaagaluarpoq, kisianni tamanna periarfissaasimanngilaq, immikkoortortaqarfimmi pisortaq nassuiaavoq:
- Taamaattumik novembarimi 2023-mut immikkut akuersissuteqarfigineqarpugut, taanna oqarpoq.
Ilisimatusarfik kingullermik 2020-nu aamma 2021-mi APV-mik suliaqarpoq.