Nunatsinni coronavirusimik tunillatsissimasup aappaa paasineqarsimasoq Kim Kielsen tusagassiortunik katersortitsinermi pingasunngormat ilisimatitsivoq. Tunillatsissimasoq Ilisimatusarfimmut attuumassuteqarpoq, suminngaannit tunillatsissimanera ilisimaneqanngilaq.

Taamatut nalunaartoqareersoq Ilisimatusarfimmi toqqissisimajunnaartoqarpoq.

Tunillatsissimasoq kinaasimasinnaanera aamma sumiissimasinnaanera  Facebookikkut eqqoriarneqaqattaalerpoq.

Uippallertoqartariaqanngitsoq Nunatta nakorsaaanera eqqissisaavoq. Tunillatsissimasoq imerniartarfinniissimanngitsoq naqissuserpaa. Pineqartoq inersimasuusoq oqaatigaattaaq. Kikkut ilagisimanerai politiinit misissorneqaleruttortoq ilisimatitsissutaavoq. Arlaqartut oqartussanit saaffigineqareersimasut Sermitsiaq.AG-mit paasineqarpoq.

Tunillaassuuttoqanngilaq

Nunatsinni maanna tunillaassuuttoqanngitsoq nakorsaanerup oqaatigaa.

- Taamaattoqarsimasuuppat napparsimaveqarfinniittut amerlasimassagaluarput. Maleruaqquneqartut malinneqarsinnaappata, immitsinnullu paarigutta, Nunatsinni tunillaassuuttoqannginnissaa suli upperaarput, Henrik L. Hansen oqarpoq.

Tunillaassuuttoqannginnissaa anguniarlugu sukaterisoqareerpoq pingasunngormat. Pisiniarfiit amerlanerpaat matuneqareerput, Nuummi pisussat taamaatiinnarneqareerlutik. Atuarfiit assigisaallu aamma matuneqarput kiisalu illoqarfimmit aallartoqarsinnaajunnaareerluni.