Silamik ilisimatusarfik
Ilisimatusarfik nutaaq ammarneqassaaq
Ataasinngornermi marsip 2-aanni Tunup avannaani issittumi ilisimatusarfik Villum Research Station atoqqaarfissiorneqassaaq. Ilisimatusarfimmi nutaami pingaartumik silap pissusia ilisimatusarfigineqassaaq
Sila ajussanngippaat ataasinngorpat marsip aappaanni nunarsuarmi ilisimatusarfiit avannarlersaat Tunup avannaani ammarneqassaaq. Taamatut tusagassiorfinnut nalunaaruteqarluni paasissutissiivoq Aarhus Universitet.
Ilisimatusarfimmik nutaanik siunertaavoq ilisimatuut nunarsuarmit tamarmeersut silap pissusiata allanngoriartorneranik sunniutaanill misissuinissaannut pitsaanerpaanik tunngavissaqartinneqarnissaat.
– Inuit atugartuussusiannut ulorianartorsiortitsinerpaaq tassaavoq silap pissusiata allanngoriartornera - tamannalu naammattumik iliuuseqarfigineqanngilaq. Tassa imaappoq, naleqqussarfigisinnaasatut isigisatsinnut qularnaarsinnaanngilarput silaannaap kissatsinnera 2 gradinut appasitsigitinnissaa. Taamaattumik pingaaruteqartorujussuuvoq ilisimassallugu sila 2 gradit sinnerlugit kissatsissappat qanoq pisoqassanersoq, ilisimatusarfiup nutaap pisortaa professor Henrik Skov oqarpoq.
Avannaarsuani atoqqaarfissiortitsineq
Pisortatigoortumik atoqqaarfissiortitsineq pissaaq Kalaallit Nunaata tunuata avannaarsuani 81°36’N 16°39V -mi - qalasersuarmit 924 kilometeriinnarnik kujasinnerusumi, Station Nord-imit ungasinngitsumi. Atoqqaarfissiortitsinermi ilaatigut peqataassapput qallunaat silap pissusianut ministeriat Rasmus Helvig Petersen, Villum Fonden-ip pisortaa Lars Hansen, kiisalu Aarhus Universitetimeersut arlallit.
Ilisimatusarnermi atortut nutaaliaanerpaat
Aarhus Universitetip ilisimatusarfik ingerlatissavaa, taannalu Villum Fonden-imit 70,5 millioner koruuninik aningaasaliiffigineqarsimavoq. Ilisimatusarfik ilisimatusarnermi atortunik nutaaliaanerpaanik atortulersorneqassaaq, universiteti tusagassiorfinnut nalunaarummi allappoq.
– Kajungernartuussappat pitsaalluinnartunik neqeroorutissaqartariaqarpoq. Villum Research Station-ikkut nutaakkut kajungernartooreernitsinnit suli kajungernarnerulissaagut. Issittumi ilisimatusarnermi sallersanut ilanngutissaagut. Tamatumuuna uagut nammineq ilisimatusarnerput pitsaasumik sunnerneqassaaq, pitsaassuseq annertussusaalu eqqarsaatigalugit, qularnanngitsumillu suliniutit amerlanerulerlutillu issittumi ilisimatusarnermi ilisimatuut suleqatigiinnerulissapput, Aarhus Universitetimi Institut for Miljøvidenskab-imeersoq Niels Kroer oqarpoq.
2015-imi issittumi ilisimatusartunit nunanit tamalaaneersunit unnuinissat 1100-t inniminnerneqareersimapput. Ilisimatuut siulliit tikereerput ilisimatusarnerillu siulliit aallartinneqareerlutik.