Ilisimatusarfik nalerisimaarneq aamma peqatigiinneq pillugit ataatsimeersuartitsilerpoq

Issittumi eqqumiitsuliorneq, peqatigiinneq aamma kinaassutsit – meeqqanut, inuusuttunut ilaqutariinnullu atugassat pitsaanerpaat.

Ulluni marlunni ataatsimeersuarnissaq, Ilisimatusarfimmi Meeqqat, Inuusuttut Ilaqutariillu pillugit ilisimatusarfiup 10. - 11. maj aaqqissuussaa taama taaguuteqarpoq.

Eqqumiitsuliorneq aamma eqqumiitsuliat qanoq ataatsimoornernik pilersitsinermut nalerisimaarnermullu iluaqutaasinnaanerannut ataatsimeersuarneq tungavoq – pingaartumik Kalaallit Nunaanni, Nunani Avannarlerni Issittumilu meeqqanut, inuusuttunut ilaqutariinnullu.

Ilisimatusarfik tusagassiuutinut nalunaarummi taama ilisimatitsivoq.

Nalerisimaarneq ataatsimoornerillu

Ataatsimeersuarnermi pingaarnertut suliniutit eqqumiitsuliornermik tunngaveqartut, nalerisimaarnermik, tamat oqartussaaqataanerannik peqataatitsinermik, inooqataanikkut atajuartitsinermik aamma meeqqanut, inuusuttunut ilaqutariinnullu pisinnaatitaaffeqarnissamut nukittorsaanissamut ilisimasanik oqaluttuarnissaq anguniarneqartoq, tassani atuarneqarsinnaavoq.

Qanoq saqqummertarnerit peqataasarnerillu immikkut sammineqassapput, pingaartumik community art aqqutigalugu – tassa eqqumiitsuliornerup najukkami inuiaqatigiinnut attuumassuteqarnermut misigisaqarfiutillugu pilersitsissutigineqartarnera.

Ataatsimeersuarnermi nutaaliorneq, eqqumiitsuliorneq aamma oqaloqatigiinneq nalerisimaanermut, peqataanermut aamma meeqqanut inuusuttunullu tamanut pisinnaatitaaffinnik qulakkeerinninnermut periuserineqarnerat sammineqassapput. Aamma kalaallit, issittumi aamma nunani avannarlerni eqqumiitsuliornermut isiginnittariaatsit sammineqassapput.

Ataatsimeersuarneq Ilisimatusarfimmi auditoriami pissaaq – Ilisimatusarfiullu Facebookiani aamma toqqaannartumik aallakaatinneqassalluni. Ataatsimeersuarneq pillugu UANI paasisaqarnerusinnaavutit.