Ilisimatusarfik doktoritut gradinik tunniussisinnaanngorpoq
Ilisimatusarfik ilisimatusartunik maanna naliliisinnaanngorlunilu doktoritut gradinik tunniussisinnaanngorpoq.
Nalunaarutip nutaap Ilisimatusarfik doktoritut gradinik tunniussisinnaanngornissaa periarfissaalersippaa. Gradit qaffasinnerpaat taakku tunniunneqarsinnaapput doktorinngorniutip tunniunneqartup nalilerneqareerneratigut doktorinngorniutillu oqaluttariarsorluni illersorneqareerneratigut, Namminersorlutik Oqartussat tusagassiorfinnut nalunaarutaanni allassimavoq.
Doktoritut gradi ukiuni arlalinni ilisimatusarluni sulinermik tunngaveqarajuppoq takutinneqartarlunilu ilisimatusarnermik paasisimasaqarneq ilisimatuutullu inerisimaneq.
Ilinniartitaanermut, Kultureqarnermut Ilageeqarnermullu Naalakkersuisoq Katti Frederiksen imatut oqaaseqarpoq:
- Ilisimatusarfik 1983-ip aallartinneraniilli piginnaaneqarluarluni ineriartupallassimaqaaq. Nunat assigiinngitsut akornanni qaffasissuseq naapertorlugu Ilisimatusarfimmi doktor gradimik maannakkut tunniussisalernissarput taamaattumik pissusissamisoorpoq.
Ilisimatusarfimmi rektorip Gitte Adler Reimerip ilisimatusarfiup doktoritut gradinik tunniussisinnaalernera nuannaarutigaa, "taamaalilluni nunatsinni ukiuni arlalinni pitsaasumik ilisimatusarneq uagutsinnit nersorniarneqarsinnaanngorpoq".