Ilisimatooq: Kalaallit Nunaat Issittumi Siunnersuisoqatigiinni siulittaasuuffimmik tigusiniarsinnaavoq
Kalaallit Nunaata Issittumi Siunnersuisoqatigiinni siulittaasuuffimmik tigusiniarneranut Ukrainemi sorsuttoqarnera pissutaasut ilagisinnaavaat, nunani tamalaani politikkeqarnermi ilisimasalik isumaqarpoq.
Issittumi Siunnersuisoqatigiinni nunat ilaasortaatiallit arlallit Ruslandip Ukrainemut saassussineranut akerliullutik Issittumi Siunnersuisoqatigiit suleqatigiinnerannit tunuarniarlutik aalajangersimapput.
Ruslandi maannakkorpiaq Issittumi Siunnersuisoqatigiinni siulittaasuuffeqarpoq, taamalu kisimiilersimalluni. Tamannalu Kalaallit Nunaata piffissami 2025-2027-mi siulittaasuuffimmik tigusinissamut periarfissarilersinnaavaa, Issittumi nunat tamalaat politikkeqarneranni ilisimasalik Marc Jakobsen Alting.dk aqqutigalugu oqallissaarilluni oqarpoq.
Inissisimaffik naammaginngikkaa
- Kalaallit Nunaatami Issittumi Siunnersuisoqatigiinni inissisimanini suli naammagilersimarpasinngilaa. Tusakkammi malillugit aallartitani siuttuusarnissaq aamma Issittumi ambassadørip kalaaliunissaa piumasarineqarsimavoq - issittumilu ambassadørip maannakkutut Københavnimiunngitsoq Nuummili allaffeqarnissaa piumasarineqarsimalluni, taanna allappoq.
Naalagaaffeqatigiit Issittumi Siunnersuisoqatigiinnut aallartitaanni siuttoorusukkaanni takorloorneqarsinnaavoq, Kalaallit Nunaata Savalimmiut qanimut suleqatigissagaa, Marc Jakobsen oqarpoq.
Aningaasaqarneq salliutinneqartariaqartoq
Apeqqutaavorli Kalaallit Nunaata Nunanut allanut Naalakkersuisoqarfiata suliassaq isumagisinnaaneraa, ilisimatooq oqarpoq:
- Ullumikkut Nunanut allanut Naalakkersuisoqarfimmi Nuummiittumi atorfillit 13-it ilinniartunik ilaqarlutik sulisarput, tamatuma saniatigut Bruxellesimi, Washington D.C-mi, Beijingimi, Reykjavikimi Københavanimilu Kalaallit Nunaata aallartitaqarfiini qulinik sulisoqarpoq. Assersuutigissagaanni Nunanut allanut Ministeeriaqarfimmi issittumut atatillugu ukioq naallugu 27-nik sulisoqartarpoq, taakkunannga 18-it Kontoret for Arktis og Nordamerikami ulluinnarni sulisarlutik.
Taakku marluullutik naligiinngitsupilussuarmik nukittussuseqarput.
- Kalaallit Nunaata anguniakkani angorusuppagit, Naalakkersuisut nunanut allanut suliassaqarfimmut aningaasaliissuteqartariaqarput, Nunanut allanut Ministeeriaqarfiup suliassarpassui amerlanerusunut agguaassinnaanngorlugit, Marc Jakobsen oqarpoq.
