piumasaqaatit

Ilisimatooq: Danskit kalaallillu Issittumi piumasaqaataat piviusunngorsinnaavoq

Danskit Qalasersuarmi 900.000 kvadratkilometerinik oqartussaaffeqalerusunnerat ataqqineqalersinnaaneranut periarfissagissaartoq ilisimatooq oqarpoq

Oqartussaaffigilerusutaq Danmarkimit tallimariaammit angineruvoq. Paasissutissat: Nunanut allanut ministereqarfik

Danmarki Kalaallit Nunaallu Qalasersuarmi Issittumi imartaq 895.000 kvadratkilometeriusumut oqartussaaffeqalerusupput. Piumasaqaatit FN-imut nassiunneqassapput.

Naak aamma Ruslandi, Canada, USA-lu aamma Qalasersuarmik oqartussaaffeqarnertik annertuserusukkaluaraat oqartussaaffigisassatut piumasaqaatigineqartut piviusunngortinneqarsinnaasut ilisimatuumit oqaatigineqarpoq.

- Oqartussaaffigerusutatut nalunaarutigineqartussaq tamaat pineqarsinnaagunanngilaq. Piumasaqaatigineqartulli annersaat oqartussaaffigineqalersinnaapput, Københavns Universitetimit Kristian Søby Kristensen oqarpoq.

Qalasersuup oqartussaaffigineqalernissaa eqqartorneqanngitsoq naqissuserpaa. Qalasersuulli imartaata naqqa pineqartoq oqaatigaa.

- Imartarujusuuvoq sikoqarfissuullunilu. Qalasersuummi naqqani uuliaqarunarnanilu gasseqarunanngilaq, Kristian Søby Kristensen oqarpoq.

Qalasersuulli imartaata naqqata oqartussaassuseqarfiginissaa nunanit allanit soqutigineqartorujussuusoq oqaatigaa.

- Politikkikkut tamanna sunniuteqartorujussuusinnaavoq. Naak Qalasersuaq pigineqanngikkaluartoq oqartussaassuseqarneq pingaaruteqalersinnaavoq. Nunammi assigiinngitsut Qalasersuaq pigerusuppaat, Kristian Søby Kristensen oqarpoq.

Danskit Qalasersuarmut oqartussaassuseqarusunnerat politikkimut tunngasuunnaanngitsoq oqaatigaa.

- Kalaallit Nunaata nunatut ilagilertussaavaa, Danmarkiunngitsup. Naalagaaffeqatigiinnerup soqutigineqarnera Danmarkimit takutinniarneqarpoq.

- Piumasaqaatigineqartut oqartussaassuuffigineqalissappata Danmarkip suliassani suliarisimassavaa.

Ataatsimiititaliarsuup aalajangissavaa nunanat sorliit Qalasersuarmi oqartussaaffeqassanersut.

Isumaqatigiinngissuteqartoqassappat nunat namminneerlutik isumaqatiginninniassapput.

Powered by Labrador CMS