Ilisimatooq ataatsimut tapiissutit pillugit: Tamanna qularnartorujussuuvoq

Ulrik Pram Gad naapertorlugu Naalagaaffeqatigiinneq tunngavissaarutingajassinnaavoq: Pineqarpoq nunanut allanut tunngasunut isumannaatsuunissamullu politikki. Danmarkilli oqartussaaffiit taakku annaassagunigit, suli akiliisarusussava?

Naalakkersuisut oqarput aap.

Siusinnerusukkut ministeriusarsimasut oqarput naagga – Danmarkimilu partiit arlallit aamma naaggaarput. Aviisi AG taamatut allappoq.

Kalaallit Nunaalli Danmarkimit avissaareerpat qallunaat tapiissuteqartarnissaannik apeqqummut ilisimatooq qanoq oqarpa?

Ulrik Pram Gad, Dansk Institut for Internationale Studier-imi ilisimatuut qullersaat, isumaqarpoq Kalaallit Nunaat kunngeqarfimmit Danmarkimit avissaaruni aningaasanik piumasaqarsinnaanavianngitsoq.

– Isumaqarpunga naalagaaffimmi innuttaasunut pisussaaffiit naapertorlugit Danmarkip pisussaaffeqarnissaa qularnartorujussuusoq, taanna oqarpoq.

Periusissatut naleqqutinngitsoq

Ulrik Pram Gad naapertorlugu tamanna pissutigalugu qallunaat piffissamut sivisuumut ataatsimut tapiissuteqarnissaannik piumasaqarnerup inatsisinut apeqqutinngortinniarneqarnera, periusissatut naleqquppallaanngilaq.

- Isumaqatigiinniarnermi sanngiinnerusutut inissisimalluni, anguniakkap inatsisitigut tunngaveqarsinnaanera iluaqutiginiarneqarsinnaavoq. Uanili inatsisilersorneq naggataatigut pineqalernavianngilaq, politikkikkulli piumassuseqarneq apeqqutaalissalluni.

– Tassa imaappa skandinaviamiut immikkut ileqqorissutut imminnut isigippat, tamannalu pissutigalugu qallunaat akileerusussasut?

– Taamaasiornikkut qallunaat ajunngitsuliortuullutik uppernarsarsinnaavaat. Piumasaqaateqanngitsumik ukiumut checkimik nassiussiinartaraanni tassuunakkut piumassuseqarluarneq takutinneqassaaq.

Ulrik Pram Gad 2023-ip tungaanut ataatsimut suliniummi, Danmarkimit Kalaallillu Nunaannit peqataaffigineqartumi, siulersortaavoq, taannalu Kalaallit Nunaata namminiilivikkiartornermut ineriartornissaanut isumassarsiortitaavoq. Suliniut ateqarpoq »Imagining Independence in the Arctic«.

Oqaluttuaq tamaat sapaatip akunnerani matumani AG-mi atuaruk.

Powered by Labrador CMS