nersornaasiineq
Ilisimatooq akimasuumik nersornaaserneqartoq
Det Grønlandske Selskabip Jens Dahl Rink-medalje-mik nersornaaserpaa. Tamatumunnga ilaatigut pissutaavoq nunatsinni inuiaqatigiinnik ilisimasaqarneq nukittorsarniarlugu sulissuteqarsimanera
Nersornaat ataqqinaataasoq, siusinnerusukkut ilisimatuunut ilisimaneqartunut tunniunneqartarsimasoq, soorlu Minik Rosingimut, Egil Knuthimut, Robert Petersenimut, Chr. Berthelsenimut, Ejnar Mikkelsenimut Lauge Kochimullu, ukioq manna antropologimut eskimologimullu Jens Dahlimut tunniunneqassaaq. Tamanna pissaaq sisamanngornermi novembarip 13-ianni, Det Grønlandske Selskabimi, ukiut 50-it sinnerlugit nersornaammik tunniussisarsimasumi, naapisimaaqatigiinnermi.
Tusagassiorfinnut nalunaarummi allassimavoq Jens Dahlip nersornaaserneqarnissaanut pissutaasoq Kalaallit Nunaata oqaluttuarisaaneranik nutaaliaanerusumik ilisimatusarsimanera, kiisalu nunat inoqqaavinik sullissisimanera pissutigalugu, minnerunngitsumik ukiorpassuarni IWGIA-mi sulisimanerminut atatillugu.
"Jens Dahlip ilisimatusarnera ilisimatuutut nunanilu tamalaani ilisimatusarnermi qaffasissorujussuuvoq, tamannali peqatigalugu ilisimatusarnini amerlasuunut siammarsarsinnaallugillu atuartitsinermi atorsinnaatissimavai. Atuakkiaasigut allaaserisaasigullu qallunaat atuartartut namminersornerunerup namminersornerullu tunuliaqutaannik, kiisalu issittumi inuiaat akornanni kulturikkut politikkikkullu attuumassuteqarnernik paasitinneqarput. Taamaasilluni Jens Dahl kalaallinik inuiannik issittumillu tamarmik ilisimasaqarneq nukittorsarniarlugu annertuumik iliuuseqarsimavoq, kalaallit-qallunaat suleqatigiinnerannut iluaqutaasumik. Tamatuma saniatigut Jens Dahl Kalaallit Nunaata aammalu namminersornerunerup namminersornerullu ilisimaneqarnerat avammut siammarsarniarlugu annertuumik suliuteqarsimavoq, minnerunngitsumik nunat inoqqaavinut allanut", Tove Søvndal Gant aamma Kirsten Thisted, marluullutik Det Grønlandske Selskabip siulersuisuini ilaasortaasut, allapput.
Rink-medalje Det Grønlandske Selskabimit pilersinneqarsimavoq siullermillu tunniunneqarpoq 1960-imi. Nersornaammut atsiunneqarsimavoq H. J. Rink, Kalaallit Nunaanni ilisimatuutut ingerlatsisutullu sulisimasoq, ilaatigullu illisimaneqartoq 1800-ukkut qiteqqunneranni demokratiip Kalaallit Nunaanni eqqunneqarneranik suliniutillit ilaattut. Nersornaat tunniunneqartarpoq pingaartumik inunnut, ilisimatusarnermikkut angusaqarluarsimasunut, aammattaarli inunnut arlaatigut kalaallinik inuiaqatigiinnik pingaarutilimmik suliniuteqarsimasunut.