Savalimmiuni qinersineq
Ilisimatooq: Akileraarutinik aaqqissuusseqqinneq Savalimmiuni naalakkersuisunik uppititsivoq
Aaqqissuusseqqinnikkut pisuut kisimik iluaquserneqarsimapput savalimmiormiullu utoqqalinersiaat ingerlaannavik akileraaruserneqartalerlutik
Savalimmiuni Lagtingimut qinersinerup kingorna naalakkersuisut kinguariarujussuarput amerlanerussutaarullutillu. Illua'tungiliuttuusimasut maanna naalakkersuisunngortitsissapput.
Tamanna qularutissaajunnaarpoq taasinerit marlunngornerup unnuaani kisinneqareernerisa kingorna.
Naalakkersuisut qinersinermi ajorsarnerannut pissutaavoq akileraarutitigut oqilisaassisimaneq ajornartorsiutitalik, Færøernes Universitetimi inuiaqatigiilerinermik ilisimatooq Gestur Hovgaard naliliivoq.
– Qularnanngilluinnarpoq aalisarnermik aaqqissuusseqqinneq, assigiissumik akileraaruteqartitsineq utoqqalinersiallu ingerlaannavik akileraaruserneqartalernerat naalakkersuisunik nuannarinnikkunnaartitsisimasut, taanna oqarpoq. Naalakkersuisut akerlilersorneqartorujussuupput ukiualunnguit matuma siornatigut assigiissumik akileraaruteqartitsineq eqqummassuk. Tamatumuunakkut siullerpaamik akissarsiaqqortuuinnaviit iluaqutissinneqarsimapput.
Tulliullugu pissutaavoq akileraarutitigut oqilisaanerit aningaasalerneqarsimammata savalimmiormiut utoqqalinersiaasa ingerlaannavik akileraaruserneqartalernerisigut. Tamanna innuttaasuni ernumalersitsivoq, amerlasuut isumaqarmata utoqqalinersianit aningaasat piffinnut atugarliorfiusunut toqqorneqassasut.
Siuariarneq
Qinersinermi ajugaanerpaavoq Socialdemokratiet, ilaasortaatitani arfinilinniit arfineq-pingasunut amerlillugit. Partiip siulittaasua Aksel V. Johannesen taaguunneqarnersaalluni 2.405-nik taaneqarsimavoq.
Maanna nunami partiini annersanngortumi siulittaasutut qularnanngilaq taanna Savalimmiuni lagmand-inngussasoq.
Sambandspartiet aamma Folkeflokkenip ilaasortaatitaat tamarmik marlunnik ikileriarput, marluullutillu Lagtingimi arfinilinnik ilaasortaatitaqalerlutik.