Inuiaqatigiit ineriartorneranni pitsaasorpassuarnik angusaqartarnikuuvugut, taamaattorli atugarissaarnerup tunngavippiai pineqartillugit pitsaanerusumik qanoq iliortariaqarpugut? Taamak aperivoq Inuit Ataqatigiit siulittaasuat Múte Bourup Egede, nunatsinnit nussortut unikaallatsinneqarnissaat pillugu partii qanoq isumaliuteqarnersoq paasiniaaffigineqarami.

- Nunarput inuuffigiuminarsartuassavarput. Toqqissilluni utoqqalisinnaaffiussaaq, kisianni aamma inuusuttunut najugaqarfigiuminartuussaaq, ilai nunani allani ilinniareerlutik nunatsinnut angerlaqqinnissaat pilerinarsartariaqarparput, taamaammat atugarissaarnerup tunngavippiaasa patajaatsuullutillu aalajaatsuussapput minnerunngitsumillu tutsuiginarlutik, Múte Bourup Egede oqarpoq.

Peqqinnissaqarfiup ajornartoornera

Peqqinnissaqarfik tassaavoq siulliullugu salliullugulu sukumiisumik aqqiiffiginiagassaq. Tassami peqqinnissaqarfik atugarissaarnerup tunngavippiaasa qiteraat aammalu patajaatsuunissaanut aalajangiisuulluinnartoq:

- Siullerpaajullugu pingaartillugulu qissimitassarput ukkatarisassarpullu siulleq tassaavoq peqqinnissaqarfik. Nalunngilarput ullumikkut peqqinnisssaqarfimmi annertuumik ajornartoortoqartoq, aamma nalunngilarput peqqinnissaqarfimmi sulisut tamaviaartut sullissinerup pitsaanerpaatinneqarnissaa qulakkeerniarlugu. Sulisut pigisavut paarilluagassaraagut aammalu taakku qaavisigut sulisussatut pisariaqartinneqartut pissarsiariniarneqarnerat eqqumaffigisassaavoq pingaarutilik, taamaammat peqqinnissaqarfimmi sulisut naalaarnerusariaqarpagut aaqqiissutissat ataavarnerusut ujartorneqarnerini. Maannalu sakkussatsialammik tunineqarnikuuvugut, tassami peqqinnissaq pillugu isumalioqatigiissitap isumaliutissiissutaani innersuussuterpassuaqarpoq atorluarneqarsinnaasunik.

- Politikkikkut sulinitsinni peqqinnissaqarfimmi ajornartoorneq sukumiisumik pimoorussamillu aaqqiissutissarsiortariaqarparput partiillu akimorlugit suleqatigiissutigisariaqarlutigu. Taamaammat neriuppunga Peqqissutsimut Naalakkersuisup isumaqatigiinniarnissanik aallartitsiniarnera partiinit akorluarneqarumaartoq, Inuit Ataqatigiit siulittaasuat, Múte Bourup Egede Sermitsiaq.AG-mut oqarpoq.

Peqqissutsimut Naalakkersuisoq, Mimi Karlsen (IA) partiinut ataatsimiisitsiniaraluarpoq 2. august, taannali piffissaligaanngitsumik kinguartinneqarnikuuvoq partiit ataatsimut tamaasa piffissami tassani katersuunneqarsinnaasimanngimmata.

Ilaqutariit meerartallit atugaat eqqumaffigisassaasut

Ajornartorsiuteqarfiup aappaa, Múte Bourup Egede naapertorlugu sukumiisumik nalilersorneqartariaqartoq tassaavoq nunatsinni ilaqutariit meerartallit ajunngitsumik atugaqarlutik inuunissaannut iliuusissat suussusersinissaat. Tassunga tunngatillugu ilaatigut Bourup Egede tikkuaavoq, nunatsinni sumiiffippassuarni ulluunerani meeqqanik paarsisarfiit amigaataanerujussuat:

- Pingaaruteqartorujussuuvoq ilaqutariit meerartallit ajunngitsumik atugassaqartinneqarnerannut tunngavissiinissaq. Eqqaamassavarpummi naatsorsuinerit naapertorlugit ukiorpassuunngitsut qaangiuppata innuttaasut ullumikkumit ikinneerarsuanngorsinnaanerat siulittorneqarnikuummat. Taamaammat pingaaruteqartorujussuuvoq ilaqutariinnut meerartalinnut atugassarititaasut pitsaasuunissaat patajaatsuunissaallu, ilaatigut meeqqeriveqarnikkut periarfissaqarluarnissaat, illoqarfissuarniinnaanngitsoq, aammali illoqarfinni nunaqarfinnilu avinngarusimasuniittuni, allaammi angajoqqaat suliffissaqaraluarlutik meeqqerivissaaleqinermik eqqugaaqqallutik sulisinnaasanngitsut pillugit paasitinneqartarpugut.

LÆS OGSÅ: Isumaqatigiissut nutaaq: Perorsaasut taasinermi akuersipput

Taamaakkaluartoq aamma perorsaasut ilinniarsimasut amigaataanerat ajornartorsiuterujussuusoq Bourup Egede erseqqissaavoq. Januar 2021 naalersoq perorsaasut ilinniarsimasut qaammammut akissarsiaat 3.000 koruuningajannik qaffanneqarput, taamaakkaluartorli perorsaasunik ilinniarsimasunik amigaateqarneq annikilliartorpasinngilaq.

Múte Bourup Egede tassunga suna pissutaanersoq tamakkiisumik akissutissaqanngilaq, taamaattorli iliuuseqarfigineqarsinnaaqqullugu ajornartorsiut sukumiinerusumik paasisaqarfigerusuppaa.

- Sulisartut kattuffii aammalu atorfillit kattuffii oqaloqatigisarnerinut pikkorinnerusariaqarpugut. Ajornartorsiutip qiterpia sunaassusersiniartariaqarparput tassanngaaniillu iliuusissavut ilusilersorlugit, Bourup Egede akivoq.

Utoqqalineq toqqissisimanartoq

Tassa Múte Bourup Egede naapertorlugu atugarissaarnerup tunngavippiai qulaajaaffigineqartariaqarput. Tassani ukioqatigiikkaat tamaasa eqqarsaatigalugit atugarissaarnermut sillimmartaarutit qanoq inneri qulaajaaffigitikkusuppai. Ilaqutariit meerartallit toqqissisimasumik inuuneqarsinnaanerisa saniatigut inuusuttut ilinniarnissaminnut periarfissaminnik atorluaanissaat, inersimasut aalaakkaasumik suliffeqarsinnaanissaat tassani pileqaannanngillat, aammali utoqqaat atugarissaarlutik toqqissillutillu utoqqalisinnaanissaat pingaaruteqarluinnarnerarpaa:

- Maanna alloriareerpugut nunatsinni utoqqartatta ajunngitsumik atugaqarlutik qoqqissisimanarnerusumillu inuuneqarlutik utoqqalisinnaanissaat qulakkeerniarlugu, tamannali naammanngilaq. Maanna naalakkersuisooqatigiinni sulissutigaarput pilersueqatigiittussaatitaanerup atorunnaarsinneqarnissaa anguniarlugu, pingaaruteqarluinnarporlu tamanna piaartumik pissasoq, Inuit ataqatigiit siulittaasuat Múte Bourup Egede oqarpoq.