Ilisimasalik: Tusagassiorfiit oqartussaaqataanermut nakkutilliisuupput
Siumut ileqqumisut tusagassiorfiit sulianik partiip isigineqarneranut ajoqutaasartunik saqqummiussinerannut akerliliivoq. Taamatut naliliivoq, Ilisimatusarfimmi tusagassiortunngorniarfiup pisortaa Naja Paulsen, Doris J. Jensen Kalaallit Nunaanni tusagassiorfinnut sakkortuumik isornartorsiuereersoq.
Siumut sinnerlugu inatsisartuni ilaasortap Doris J, Jensenip tusagassiorfiit piffissami kingullermi isornartulinnik arlalinnik saqqummiussinerannu saassusinera piviusorsiorpaluttutut nipeqanngilaq, Taamatut oqarpoq, Ilisimatusarfimmi Inuiaqatigiilerinermut, Aningaasaqarnermut Tusagassiorfeqarnermullu Insitutimi pisortaq.
- Taamatut oqartoqartarnera nalinginnaasuuvoq, tassa isornartortalinnik ilanngutassiisoqaraangat ingerlaannartumik tusagassiorfiit arlaannik malersuinerarlugit isornartorsiorneqartarput - Matumani partii Siumut taamaaliorpoq, Naja Paulsen Sermitsiaq.AG-mut oqarpoq.
Taanna isumaqarpoq, pisunik taamatut qisuariaateqartarneq oqartussaaqataanermut iluaqutaanngitsoq. Politkkerit suliassatik isumagissavaat, tusagassiorfiit suliassatik aamma isumagivaat. Tamanna paasineqarsinnaasariaqarpoq, aamma tamatumunnga atatillugu politikkerit akisussaaffimminnik ilisimaarinnittariaqarput, taanna oqarpoq.
- Politikkerit ilikkartariaqarpaat, tusagassiorfiit inuiaqatigiinni oqartussaaqataaffiusuni immikkorluinnaq suliassaqarnerat. Tusagassiortut tassaapput misissuisussat oqartussaasunillu nakkutiginnittussat, taanna oqarpoq.
Oqartussaaqataanermi ammasumik oqallittoqartariaqartoq
Naja Paulsenip erseqqissaatigaa, tusagassiorfiit isornartunik ilanngutassiortussaasut, pisimasunillu isornartumik samminnittussaasut, pineqartunut nuanniittaraluarpataluunniit.
Oqartussaaqataanermut pitsaanerpaassaaq, sammineqartut ilungersunaraluarpataluunniit oqaluuserineqartarnissaat, inuiaqatigiinnilu politikkerit ammasuunissaannik kissaateqartuni oqallisigineqarlutik, Naja Paulsen oqarpoq.
- Saqqqummiunneqartoq eqqunngitsuuppat, uppernarsiniarlugu oqaluttuarineqariaannaavoq, taanna oqarpoq.
Doris J. Jensen isumaqarpoq, tusagassiorfiit Siumumut malersuivallaartut, aamma nunami partiit annersaannik soqutiginninnerminni arlaatigut siunertaqapilussimassasut.
Tamannali naapertuuttumik nassuiaatissartaqarpoq, Naja Paulsen nassuiaavoq.
- Partiimi pissaanermik tigummiaqartoq, taamalu tusagassiorfinnit apeqqutigineqartartunik iluaqutissanik assigiinngitsunik pissarsisinnaallunilu pissarsisartoq pineqarpoq.
Pissaanermik tigummiaqartut
Assrsuutigalugu inatsisartuni ilaasortat sulinerminnut atatillugu biileqartinneqanngillat, Naalakkersuisullu kisimik taakkuupput nunami inuussutissarsiorneq, tapiissutit allallu pillugit aalajangiisartut.
Taamaammallu aamma taakkuupput, suliamut attuumassuteqarpallaartarnermut pissaanermillu atornerluisarnermut tunngatillugit sammineqartartut. Tamanna atorsinnaasariaqarpaat, Naja Paulsen oqarpoq.
- Qinikkat tamarmik ilisimasariaqarpaat, piffissat ilaanni tusagassiorfitsigut sammineqarsinnaanertik. Malersuineq matumani pineqanngilaq, pissutsilli allaaserineqartariaqartut pineqarlutik, taanna oqarpoq.
-Siumuugaanni Siumuunngikkaanniluunniit oqaluttuassaqartuaannarpoq. Partii sorliugaluarpalluunniit oqaluttuassat taamatut ittut saqqummiunneqartuaannarput. Oqaluttuarineqartussanik saqqummiussinissamut tunngavissaqartarpoq. Tusagassiorfiit tassa suliassaat. Oqartussaasut inissisimanertik atorlugu atornerluinnginnissaat qulakkeerniarlugu tusagassiorfiit saqqummiisussaapput.