Ilisimasalik: Kalaallit Nunaanni periuserineqartoq isumatusaarneruvoq

Nunat allarpassuit maannakkorpiaq coronavirusimut akiuiniartut assigalugit Kalaallit Nunaat inissisimanngilaq. Taamaammat periuserineqartoq, tuniluunnerup nunamut sapinngisamik anngunnaveersaartinneqarnerata attatiinnarneqarnissaa isumalipilussuuvoq. Taamatut isumaqarpoq, Statens Serum Institutimi tuniluuttumik nappaalanersuaqarnerani pitsaaliuinermilu nakorsaaneq Anders Kock. Danmarkimi coronavirusip nakkutigineqarnerani, pilersaarusiorneqarnerani il. il. suleqataasuuvoq.

- Kalaallit Nunaanni matusisoqarsinnaavoq, nunanili allani taamaaliortoqarsinnaanani, taanna oqarpoq.

Periusissatut toqqarneqarsimasoq, Danmarkimi 'siaruatsaaliuinermut' assinguvoq, tassa nunami tunillatsissinnaasut amerlassusaannik killiliiniarneq tunillatsissimasunillu nassaarniarneq salliutillugit suliaqarnermut assinguvoq.

Anders Koch Statens Serum Institutimi suliaqartarnermi saniatigut, Rigshospitalimi Infektionsmedicinsk Klinikimi nakorsaanertut aamma Nuummi Dronning Ingridip Napparsimmavissuani nakorsartittunut immikkoortortaqarfimmi nakorsatut atorfeqarpoq. Kalaallit Nunaanni tuberkuloseqartunik ulluinnarni nakorsaanertut isumaginnittarpoq. Taamaammat Kalaallit Nunaanni pissutsit qanimut malinnaaffigiuaannarpai.

Kalaallit Nunaat matuneqarsinnaasoq

- Maannakkorpiaq Danmarkimisut Kalaallit Nunaanni imatut tuniluuttoqanngilaq, sulilu 'siaruatsaaliuinissamut' periarfissaqarpusi. Taamaammat isumaqarpunga, periusissiaq naapertuuttoq nunamit toqqarneqarsimasoq, Anders Koch oqarpoq.

Nunap avinngarussimasumi inissisimanera pissutigalugu tuniluunnerup siaruaannissaa pinngitsoortinneqarsinnaavoq, peqatigitillugulu tunillatsissimasut ikittunnguit nakkutigineqarpata, ajornartorsiornerup ajunngitsumik qaangerneqarsinnaanera tunngavissaqarluarpoq, ilisimasalik oqarpoq.

- Killeqarfiit ammaannartinneqarpata, tunillatsissimasorpassuit nunamut isaasinnaapput, taamaalisoqarpallu peqqinnissaqarfik malinnaasinnaajunnaartillugu tuniluunneq sukkavallaamik siaruaassinnaalluni, taanna oqarpoq.

Taamaalluni angalasut nunamut isernissaat ammaanneqaraluarpalluunniit, ingalassimatitsiniarneq pingaaruteqarluinnartussaavoq, ilisimasalik oqarpoq.

Tuniluunnerup ingalassimatinniarnera annikillisarneqarneralu

Maannakkut nunmik matusinikkut, virusi takkuppat, virusip saakkortussusaa annikillisinneqarsinnaavoq.

- Tuniluunnerup siaruaannera ingerlangaatsiareerpat, Danmarkimi Europallu sinnerani inuppassuit qaangeereersimassapput. Taamaammallu tunillanneqarsinnaajunnaarsimassallutik. Tamatuma Kalaallit Nunaannut tikittut tunillaassuisinnaanerat annikillisissavaa, Anders Koch oqarpoq.

Taamaalilluni tuniluuttoqarnera unikaallassaaq, ajornannginnerusumillu isumagineqarsinnaalerluni, Anders Koch naggasiilluni oqarpoq.