Ilisimasalik: Internetsikkut paasissutissaasivik pingitsaaliiniarnermut atorneqarsinnaavoq
Kalaallit Nunaanni inuit pingaarutillit pillugit internetsikkut paasissutissaasivimmiittoqarneq aalajangiisartunik sunniiniarnermut atorneqarsinnaavoq, naggataatigullu pinngitsaaliiniarnermut atorneqarsinnaalluni, ilisimasalik naliliivoq.
Kinamiut suliffeqarfiutaata Kalaallit Nunaanni politikkerinik inuussutissarsiortunillu pingaarutilinnik internetsikkut paasissutissaasivimmiittuuteqarnera, nunani allani aalajangiisartunik sunniiniarnermut atorneqarnissaa qularnanngitsumik matumani pineqarpoq.
Peter Viggo Jakobsen Forsvarsakademiimeersoq Sermitsiaq.AG-mut oqarpoq:
- Aalajangiisartut sunnerniaraanni kikkuunersut ilisimasariaqarpoq. Kina saaffigissanerlugu ilisimasariaqarpoq.
- Aalajangiussassanut sunniiniarneq pineqarpoq, Peter Viggo Jakobsen oqarpoq.
Paasissutissat taamatut ittut pinngitsaaliiniarnermik kinguneqarsinnaapput, ilisimatooq nassuiaavoq:
Suliffeqarfik paasissutissanik katersisimasoq
- Inuit isumaannik allannguiniarluni pinngitsaaliiniartoqarsinnaanera eqqarsaatigigaanni, paasissutissaasiviit taamatut ittut aqqutigalugit mianernarsinnaasunik nassaartoqarsinnaavoq. Oqanngilanga paaissutissaasivik taamatut atorneqarniartoq, taamatulli atorneqarsinnaaneranut periarfissaavoq, Peter Viggo Jakobsen oqarpoq.
Kalaallit Nunaanni politikkerit inuussutissarsiortullu 60-inik amerlanerusut attaveqaatinut pingaarutilinnut attuumassuteqartut, assitalerlugit, sumik atorfeqarnersut ilaqutaannullu tunngassuteqartut Kinamiut internetsikkut paasissutissaasivianniittut tallimanngormat saqqummiunneqarput.
Aviisi Jyllands-Posten taamatut allappoq.
Suliffeqarfiit oqartussat sinniisuattut atorneqartartut
Internetsikkut paasissutissaasivik Kinami suliffeqarfimmit Zhenhuamit, paasissutissanik katersisimasumit suliarineqarsimavoq. Peter Viggo Jakobsen naapertorlugu, suliffeqarfiup assersuutigalugu niuerfiit nutaat pillugit paasissutissanik katersisimanera tupigineqartariaqanngilaq.
Assersuutigaluguli Danmarkimut sanilliullugu, Kinami suliffeqarfiit naalagaaffillu imminnut attuumassuteqarput. Taamaammat Peter Viggo Jakobsenip ilimagaa, paasissutissat Kinap naalagaaffianut ingerlateqqinneqarsimasinnaanerat:
- Kinami suliffeqarfiit naalagaaffillu imminnut ataqatigiittupilussuupput. Taamatummi suleriaaseqarput. Naalagaaffiup suliffeqarfiit sinniisumittut atortupilussuusarpai. Taamaammat naatsorsuutigisariaqarparput, paasissutissat ingerlateqqissimassagaat, Peter Viggo Jakobsen oqarpoq.
Tamanna Danmarkimi Kinamiut ambassadeqarfianit itigartinneqarpoq. Ambassadep Jyllands-Postenimut ilisimatitsissutigisimavaa, Zhenhua namminersortumit pigineqartoq naalakkersuisunullu atassuteqanngilluinnartoq.