Ilisimasalik: Kinamiut aamma Amerikamiut pissaaneqarniuuttut

Danmarkip Kangilinnguanut soqutiginnileqqinnera Kinamiut sakkutooqarfiusimasumik pisiniarsarinerannik tunngaveqartoq, nutaarsiassaqartitsivik Defencewatch ippassaq oqaluttuarpoq.

Piffissami sivisuumi pissaaneqarniunneq
Damien Degeorges Reykjavíkimi siunnersortaasoq ukiorpassuarni Kalaallit Nunaat aamma Issittoq sammisarai. Taassumalu Defencewatchimit paasissutissat tutsuiginartuusut nalilerpaa.

USA-p aamma Kinap akornanni piffissami sivisuumi Kinap kujataani imartaani pissanganartorsiortoqartareerpoq sioorasaarisoqartarlunilu.

Akerleriinneq Issittumi ersertoq
Ukiunili kingullerni pissaaneqarniunnerup illuatungaa issittumi saqqummeriartortoq, Damien Degeorges naliliivoq. Taassuma Reykjavíkimit isigisaa annertuvoq, tassami Island aamma Nunarput pissaanilissuarnut sumiiffimmi 'inissisimaqatigiimmata'.

- Tamanna Islandimit Kalaallit Nunaannit ersarinnerusumik takuneqarsinnaavoq. Kinap Reykjavíkimi illu aallartitaqarferujussuat takussutissat ersarissut ilagaat, misissueqqissaartartoq Kinap Issittumiinnera pillugu taama oqaluttuarpoq.

Kalaallit Nunaanni takussaanerulertut
Kina Nunatsinni maannamut tunuarsimaarnerunikuuvoq, Nunarput Islanditut suli namminersortuunngimmat.

- Ukiuni kingullernili Kina Kalaallit Nunaanni ersarinneruleriartorpoq. Shenghep Kuannersuarnut soqutiginninnera tamatumunnga assersuutaannaavoq, Damien Degeorges naliliivoq.

Amerikamiut soqutigisaasa qanittuini, Kinap sakkutuunik sakkulersorlutik nukersaarnissamut tunuarsimanani takutittareerpaa.

- Obamap 2015-imi Alaska tikeraarmagu Kinap sakkutuuisa umiarsuaat Beringshavetimiittut, pissaanilissuit taakku marluk pissaaneqarniuunnera ersarissumik takuarput.

Atuaruk: Kinamiut Kangilinnguit pisiariumagaluarpaat

USA-p eqqaani
Kinamiullu Kangilinnguit pisiarinissaanut soqutiginninnerat taamatut aamma paasineqassaaq.

- Issittumi USA-p eqqaani inississinnaallutik takutinniarlugu misiliinertut, Kangilinnguanik pisiniarsarineq nalilerpara.

Naalakkersuisut isumaliutigisaannut qanimut ilisimannittoq Defencewatc.dk-mut oqarpoq, Kinamiut naalakkersuisui aamma Namminersorlutik Oqartussat siornatigut aningaasaliinissanik soqutiginnilersitsiniarsimasut akornuserniarnagit, danskit naalakkersuisuisa Kangilinnguit paariinnarnissaanut pissutiviusoq paasissutissiissutiginaveersaarpaat.

Vittu ilisimatinneqanngitsoq
Namminersorlutik Oqartussat suliaq pillugu aamma ilisimatinneqarsimanngillat.

- Nunanut Allanut Pisortaqarfik imaluunniit naalakkersuisoq Vittus Qujaukitsoq suliaq pillugu danskit naalakkersuisuinit paasitinneqarsimanngitsoq uppernarsarsinnaavara, pisortaqarfiup pisortaa Kai Holst Andersen oqarpoq.

Qularnaatsumik Namminersorlutik Oqartussat immikkoortuini allaneersut ilisimatinneqarsimanersut oqaatigisinnaanngilaa. Kisianni suliami isumannaatsuunissamut politikkimut tunngasumi ilimanarpianngilaq.

Defencewatch naapertorlugu ministeriunerup Lars Løkke Rasmussenip (V) partiini illersornissamut isumaqatigiissuteqartut siuttuinut upernaaq pisoq pillugu ilisimatitsivoq.

Illersornissamut ministeriaqarfik juunip 30-anni Namminersorlutik Oqartussanut mailimik nassiussipput, Kinamiut suliffeqarfiata Kangilinnguit pisiarerusukkaa tassani atuarneqarsinnavoq, tamannalu pissutigalugu suliaq isumaliutigeqqinneqartoq.

Danmarkip suliaq pillugu USA oqaloqatigisimaneraa qularnaatsunik paasissutissaqanngilaq.