Ilisimannittussarsiorneq: 15-inik ukiulik Sisimiuni arfininngormat persuttarneqartoq
Aqqusinermi Nikkorsuit-ni, imerniartarfiup Raajap ungasinngisaani nukappiaqqamik 15-inik ukiulimmik persuttaasunik takunnissimasinnaasunik Sisimiuni politiit ujaasipput.
Sisimiuni politiit sapaatip akunnerata naanerani nalunaarfigineqarput aqqusinermi Nikkorsuit-ni, imerniarfiup Raajap ungasinngisaani arfininngornermi 29. juni nalunaaqutaq 00.30 missaani persuttaasoqarsimasoq.
- Kalaallit Nunaata Politiivi persuttaasoqarneranik takunnissimasinnaasumik/nik ujaasipput, susoqarsimaneranik paasiniaanermut atatillugu, politiit tusagassiorfinnut nalunaaruteqarluni ilisimatitsivoq.
Angutit marluk taartunik atisallit
Politiit paasissutissaataat naapertorlugit nukappiaraq 15-inik ukiulik angutinit marlunnit saassunneqarsimavoq tilluarneqarsimalluni. Aamma tigummineqarsimavoq, angutillu aappaata sikaritsimik kiinaatigut qamitsivigalugu uutissimallugu.
- Persuttaasut persuttarneqartup ilutigisinnaavai, ukioqqortunerullutilluunniit. Taartunik atisaqarput, politiit nassuiaapput.
Persuttaanermik ilisimannittut Sisimiuni politiinut, telefonnumer 70 13 22 attaveqaqquneqarput.