Ilisarititsineq: Niuertup ernera Arsummiu
Anders Jonas Brønsip inuussutissarsiornikkut ingerlalluarnera pillugu oqaluttuaq, tallimanngormat ualikkut toqunangalluni nassaarineqartup alianaqisumik Aalborgimi umiarsualivimmi naggaserneqartoq, nunaqarfimmi Ivittuut eqqaaniittumi aallartippoq.
Angutaa Palle Brøns 1940-kkut naalerneranni Kalaallit Nunaannut tikippoq, Ivittuunilu piiaaffimmi sulivoq, tassani Else naapippaa. Palle piffissap ilaani Danmarkimut uterpoq, Andersilu Arsummi inunngorpoq. Angutaa nunaqarfimmut utermat aappariit niuerfimmik ammaapput.
Anders meeqqat atuarfianni atuarnermini Holbækimut qallunaatut ilinniariartortinneqarluni aallartinneqarpoq, kisianni realskolemi Nuummi 1968-imi soraarummeerpoq. Tamatuma kingorna Danmarkiliaqqittariaqarsimavoq. Tassani Ikastimi niuernermut tunngasumik 1973-imi soraarummeerpoq.
Umiarsuit usisaannik isumaginnittumi sulisoq
1970-ikkut aallartinneranni kapisilinnik saarullinnillu aalisarneq ingerlalluartorujussuuvoq, Anders Brøns ukiualunni aalisartuuvoq, tamatuma kingorna 1977-imi 1985-imut umiarsuit usisaannik isumaginnittumi namminersortumi suliffeqarpoq.
Suliffeqarfimmik nutaamik pilersitserusunneq ukiuni 1984-imi aamma 1985-imi piviusunngortinneqarpoq, tassani Hans Pavia Egede peqatigalugu suliffeqarfik Egede & Brøns pilersippaat, kilisaatinik umiarsuaatileqatigiiffik.
Jens Salling 1985-imi suliffeqarfimmut ilannguppoq. Hans Pavia Egedep piginneqataassutsini 2000-imi ukiut 15-nit suleqatigeereernerup kingorna tunivai, Hans Pavia Egedep piginneqataassutai Anders Brønsip aamma Jens Sallingip pisiaraat. Taamanili Polar Seafood Greenland A/S-imi piginneqataassutit avillugit pigaat.
Japanimi aallartinneq
Inuussutissarsiornikkut ingerlalluarneq Japanimi niuerfimmut siusissukkut ammaanneqarneranit aallartippoq, tassani raajanik avammut tunisisoqarpoq.
1985-imit ingerlatseqatigiiffiit pilersinneqartut amerlalluinnarput.
Kalaallit Nunaata aamma Danmarkip avataani Polar Seafood tunisassiorfinni imaluunniit tuniniaanermik suliaqartunit nunani Ruslandimi, Ukrainemi, Norgemi, Tuluit Nunaanni, Canadami, Serbiami aamma Tysklandimi piginneqataassuteqarpoq.
Polar Seafood Greenland A/S-ip kaaviiaartitai 3 milliardit koruuninit amerlanerulersimasut, ukiunilu kingullerni suliffeqarfiup akileraareernermi 200 millionit koruunit sinnerlugit angusaqartarpoq. Nammineq aningaasaatit katillugit 1,4 milliardit koruunit missaanniipput, sulisullu 900-nit amerlanerupput.
Ataqqinaatitut atorfiit arlallit
Anders Jonas Brøns Grønlandsbankenip siulersuisuinut ilaasortaavoq, siornatigullu Islandip Nuummi generalkonsuliusimallunilu Great Greenlandip siulersuisuini siulittaasuusimavoq.
Angutaavoq ingasattajaarluni atuisuunngitsoq. Tunuarsimaartoq, sallaatsoq aamma pisuussutiminik pingaakujuttorsiortuunngitsoq.
Timmisartumi akisunerniinnani nalinginnaasuni issiarusunnerusartoq oqaatigineqartarpoq, taamaakkaluartoq nunarsuarmi arlalinnik illuuteqarpoq. Mallorcamilu millioninik nalilimmik angisuumik illoqartoq ilisimaneqarpoq.