32-nik ukiulik Poul-Erik Siegstad Danmarks Tekniske Universitetimi (DTU-mi), Issittumi Sanaartornermik Attaveqarnermillu diplomingeniøritut ilinniagaqarpoq. Semesterit arfinilissaat ingerlappaa, aalajangersimavorlu taanna Svalbardimi, issittup qeqertaani, Norgep Qalasersuullu akornanniittumi, The University Centre in Svalbardimi (Unis), paarlaasseqatigiinneq aqqutigalugu ingerlanniarlugu.

Issittumi Sanaartornermik Attaveqarnermillu diplomingeniørinngorniat 90 procentiisa nunanik allanik paarlaateqatigiilluni atuariartorsinnaaneq atortarpaat, assersuutigalugu Norgemut Canadamulluunniit. Poul-Erik Siegstadip, Kalaallit Nunaanni inunngorlunilu peroriartorsimasup, tamanna atorusulluinnarsimavaa. Nuannaarutigaa Unis-imukarsinnaasimagami, tassani ”frozen ground engineering” ilinniarfigiartorlugu.

– Issittumi nunani sanilitsinni sanaartoriaatsit misissorusuppakka, misilittakkanik ilisimasanillu, nunatsinni atorsinnaasannik, katersiniarlunga. Taamaattumik Svalbardimut paarlaateqatigiinnissaq toqqarsimavara. Isumaqarpunga nunami qeriuaannartumi qanoq sanaartortarneq takullugu soqutiginassasoq. Assersuutigalugu takusimavara Kalaallit Nunaanni takusimasannit maani allaanerulluinnartumik toqqaviliortartut, ilaatigut sukanik toqqaviliorlutik, Poul-Erik Siegstad oqarpoq, taassumalu siunertaraa semesterimi tullermi Islandimi ingeniøritut ingerlatsivimmi praktikkerniassalluni.

Ilinniarneq pillugu ilanngussami allaaserisaq tamaat atuarsinnaavat