Ilinniartut nunarput pillugu ilinniartinneqartut

Ilisimatusarfik Nordkursimut qaaqqusisuuvoq tassaavorlu Nunani Avannarlerni ilinniartunut aasaanerani ilinniartitsineq.

Uani assimi takuneqarsinnaapput ilinniartut aasaq manna Kalaallit Nunaat pillugu ilinniarniarlutik aalajangersimasut.

Ilinniartut Nunat Avannarliit tamaneersut juulip qaammataani sapaatip akunnerni pingasuni programmimi Ilisimatusarfimmiit ilinniartitsisulerlutik ilinniarput, taakkua oqalugiarput Kalaallit Nunaallu pillugu kulturi, tusagassiorfiit, tv, filmit, isiginnaartitsineq, geologi, inuiaqatigiinni pissutsit, oqaluttuarisaaneq ullumikkullu pisut pillugit ilisimatusarnertik oqaluttuarivaat.

Danmarkimiit, Savalimmiuniit, nunatsinniit, Norgemiit, Finlandimiit, Sverigemiillu allallu nunat Nunat Avannarliit avataaneersuniit Frankrigimiit, Italiamiit Tysklandimiillu ilinniartut 26-t tusarnaaginnanngillat aammali Kalaallit Nunaat tusarnikuusartik maannali ilisimanerulerfigisartik pillugu ilinniartitaanerminni peqataalluarput. Aasaanerani ilinniarneq ilinniarnerannut atatillugu ilaavoq.

Kalaallit Nunaat nutaaliaasoq pillugu paasisaqarneruneq

Ilisimatusarfimmi ilisimatusarneq ilinniartitsinerlu ilinniarnerminni kisiisa iserfiginngilaat aammattaarli Kalaallit Nunaat nutaaliaasoq misiginissaanut periarfissinneqarput.

Illoqarfimmi isiginnaartitsisut, nipilersorneq caféllu misigivaat, nunaqarfiusimasoq mallertillugu umiatsiarlutik tikeraarpaat, qaqqasiorsimapput angerlarsimaffinnilu katerisimaarnerni, kaffisortitsinerni nereqatigiinnernilu peqataasimallutik. Ilinniartut Nunatta Isiginnaartitsisarfiani, Nunatta Katersugaasiviani Eqqumiitsulianillu Saqqummersitvimmi takornariartitaanissamut tikilluaqqusaasimapput. Aput arsarnerillu takunngitsoorpaat akerlianilli Nuup ukiuni qulikkuutaanni ullut kiannerpaaffii misigaat.

Per Rosing fortæller om Grønlands historie

Ilisimatusarfimmilu ullut unnuillu ullorpassuit tiimerpaaluillu oqalugiarnernut atorpaat. Kalaallit oqaasiisa sannaanik, oqaluttuatoqqanik, Danmarkip Kalaallit Nunaatalu oqaluttuarisaanikkut ullumikkullu attuumassuteqarnerat, kalaallit filmiliaat, nipilersuutaat atuakkiaallu pillugit kalaallinit erinniortunit atuakkiortunillu peqataaffigineqartumi ilinniartinneqarput. Ilinniartut maanna kalaallisut erinarsoqataasinnaanngorput uaartarnerlu paasisaqarfigaat, nalunngilaallu qaqqat Kalaallit Nunaat qanoq ilusilersimaneraat.

Peqataalluarnissaq pingaaruteqartoq

Nuummi misigisassarpassuaqaraluartoq ilinniartut ilinniartitaanerminni peqataalluarnissaat piumasarineqarpoq. Katillugit 50-60 tiimit una aasaq atuassapput. Peqataanissaq maleruagassaavoq ilinniarnerlu tamaat ilinniakkerinermik imaqarluni. Angusisutut 10 ECTS-pointinillu karakterinnanniarlutik misilitsissapput. Aasaanerani ilinniarneq ilinniartitsisumiit Jette Rygaardimiit ataqatigiissaarneqarpoq.

Powered by Labrador CMS