Ilinniartut marluk 300.000 koruunit sinnerlugit nalilinnik legatinnattut

Ivalo & Minik Fonden-imi siulersuisut martsip qaammataani ataatsimiinneranni legatit marluk 300.000 koruunit sinnerlugit nalillit tunniunneqassasut aalajangiunneqarsimavoq.

Legatit ilinniartunut malunnut - Malik Koch Hansenimut aamma Lana Hansen Larsenimut - tunniunneqartut, aningaasaateqarfimmit tusagassiorfitsigut nalunaaruteqarnermi ilisimatitsissutigineqarpoq.

Malik Koch Hansen International University of Japan-mi Inuiaqatigiilerineq ilinniariaqqiffiginerani ingerlariaqqinnissaminut legatinnappoq.

Lana Hansen Larsen Language International Campus I Seoul, Sydkorea-mi Korea-miusut ilinniarnissaminut legatinnappoq.

Legatit iluaqutaanissaat neriuutigineqartoq

Siulersuisuni siulittaasoq Minik Rosing tunniussinermut atatillugu imatut oqarpoq:

- Ivalo & Minik Fonden-imi nuannaarutigiuaannarparput ilinniartut nunarsuatta ilaannut
ilinniariaqqittarnerannut ikiuussinnaagaangatta. Neriuppunga legatit ilinniartunut Kalaallit Nunaannullu iluaqutaaqqissasut.

Aningaasaateqarfimmit ilisimatitsissutigineqarpoq, Ivalo & Minik Fondenimit nunatta avataanut ilinniariartartunut 2014-miilli Kalaallinut legatit 50-it sinnilaarlugit
tunniutereersimalerai.

Ivalo & Minik Fonden ukiumoortumik ukunannga aningaasaliiffigineqartarpoq NunaFonden, Royal Greenland A/S, Royal Arctic Line A/S aamma GrønlandsBANKENs Erhvervsfond, aningaasaliissutillu tunngavigalugit legatinik agguaassisarluni.

Ukiamut periarfissiisoqaqqissasoq

- NunaFonden, Royal Greenland A/S, Royal Arctic Line A/S aamma GrønlandsBANKEN
inuussutissarsiornermut aningaasaateqarfianiit tunniussaqarnermikkut inuiaqatigiinni akisussaqqataanerat qujamasuutigaarput. Aningaasanik tunissuteqartarsimanngikkaluarpata legatinik tunniussisarsimanavianngikkaluaratta, Minik Rosing nassuiaavoq.

Ivalo & Minik Fonden ukiamut legatinik tunniussisarnini ingerlateqqissavaa. Qinnuteqaatit ingerlaavartumik tiguneqartarput. Qinnuteqarnissamut killigitinneqartoq tulliuvoq 1. oktober 2022.