Ilinniartut ineqarfiini putsumut kalerrisaarutit ikkussuullugit aallartinneqartut

Sisimiuni ilinniartut ineqarfiat decembarip aallartinnerani ikuallammat ajorluinnartumik pisoqarsimasinnaagaluarpoq. Ikuallannermi unnuakkut inuusuttut sininneranni aallartissimavoq, ilinniartullu ineqarfiat putsumut kalerrisaaruteqarani. Silataanit nilliasoqarneratigut inuusuttut marluk itertinneqarsimanngitsuuppata ajorluinnartumik pisoqarsimassagaluarpoq. Ikuallattoqarmat marluk annikitsuinnarik putsumik iioraasimapput.

Tamatuma kingorna politikkikkut piumasaqaatigineqarpoq ilinniartut ineqarfiini tamani putsumut kalerrisaarummik ikkussuisoqassasoq. Ilinniartitaanermut Naalakkersuisup, Ane Lone Baggerip (S) ilinniartut ineqarfiinut tamanut putsumut kallerisaarusiisoqarnissaanik piumasaqaat nassiussimavaa.

Suliassaq maanna aallartinneqareerpoq, Pele Brobergip (PN) §37 naapertorlugu apeqqutaanut akissuteqaammi taamatut allassimasoqarpoq.

- Ilinniartut inissiaanni tamani ikuallattumi putsumut kalerrisaarutinik ikkussuisitsinissaq sulissutigalugu aallartinneqareerpoq. Sumiiffinni ilinniagaqartut inissiaataannik aqutsisoqarfiit, inissiaatitik ikuallattumi putsumut kalerrisaaruteqarnersut, kalerrisaaruteqannginnersulluunniit nalunaaruteqaqquneqarput. Ilinniartut inissiani tamani ikuallattumi putsumut kalerrisaarutinik ikkussuisitsinissaq matumani siunertarineqarpoq, Ane Lone Bagger aissteqaammini allappoq.

Tamatumunnga peqatigitillugu illuliornermut malittarisassat nutaat suliarineqarput, inissianilu nutaani, akunnittarfinni ilinniartunullu inissiani putsumut kalerrisaarutinik qaammaqqutit aqqutaannut ikkussuinissamik piumasaqaatit ilanngunneqassallutik.