Ilinniartut immikkut pisariaqartitsisut atualertut quleriaatinngorsimasut
Ilinniarnertuunngorniarfimmi ilinniarlutik aallartittut immikkut pisariaqartitsisut, immikkut suliniuteqartut siunnersuisalermatali amerleriarujussuarput. Immikkut suliniuteqartut ilinniartitsisunik siunnersuisarput.
Ilinniarnertuunngorniarfimmi ilinniartut immikkut pisariaqartitsisut ersinngitsumilluunniit innarluuteqartut ilinniartarnerannut atatillugu siunnersuisoqartalerpoq 2017-imi. Ukioq taanna GUX-S-imi ilinniartoq ataaseq immikkut suliniuteqartunut attuumassuteqarluni aallartippoq. Immikkut suliniuteqartut ilinniarfimmut, qanigisaasunut ilinniartitsisunullu, ilinniartup qanoq ilinniartinnissaanik tapersersorneqarnissaanillu siunnersuisarpoq.
Immikkut suliniuteqartunut attuumassuteqartut ilinniartut ukioq manna aallartittut quliupput.
Immikkut suliniuteqartut 2017-imiilli misiliutitut ilinniarnertuunngorniarfinnut siunnersuisalerput. Ukiullu pingasut misiliummik ingerlatsisoqareersorlu, ilinniaqqiffinnut allanut Majoriamullu siunnersuisarneq neqeroorutaalerpoq.
Tarnip pissusianik ilisimasalik Else Poulsen, GUX-S-imut attuumassuteqartoq oqaluttuarpoq, immikkut suliniuteqartut ilinniarnertuunngorniarfinni pisariaqartinneqartut:
- Ilinniartut ilinniartitsisui immikkut ilinniarsimanngillat ersinngitsumik innarluuteqartunik ilinniartitsinissaq, taamaammat pisariaqarluinnarpoq ilinniartitsisut ilinniartitseriaatsimik – innarluut imaluunniit nappaammik suussisersimasunik – immikkuullaarissumik ilisimasaqarnissaat. Saniatigut aamma ilinniartitsisut pisariaqartittarpaat tusarnaarneqarnissaq aammalu nalornineq naapertorlugu oqaloqateqarsinnaaneq, Else Poulsen Sermitsiaq.AG-mut oqaluttuarpoq.
Taanna oqaluttuarpoq ilinniartut angajoqqaavi immikkut suliniuteqartunut siunnersortikkumallutik aamma saaffiginnittartut.
Saaffiginnittut amerliartuaarput
Else Poulsen oqaluttuarpoq ilinniartitsisut angajoqqaallu saaffiginnittartut amerliartuaartut. Taassumalu neriuutigaa periarfissaq ilinniaqqiffinni aamma atorluarneqarumaartoq, ilinniartut ersinngitsumik nappaateqartutut paasineqarsimasut ilinniarnermi aqqutissiuunneqarluarnissaat eqqarsaatigalugu.
Taamaattoq pitsanngorsagassatut tikkuarpaa meeqqat atuarfiini immikkut ittumik atuartinneqarsimasut soraarummeertillutik naammassinnissimasutut pappiaqqamik uppernarsaateqaratilluunniit anisartut allanngortinneqartariaqarnerat.
- Meeqqat atuarfianiit pappiliaqaratilluunniit anisartut, tassa immikkut atuartinneqarsimasut, soraarummeersinnaanerat eqqumaffiginerunissaa pisariaqartutut isigineqarpoq – soraarummeersinnaanngippatalu piginnaasaat naapertorlugit uppernarsaateqarnissaq pingaartutut eqqaaneqarsinnaavoq, Else Poulsen isumaqarpoq.
Taassuma ilisimatitsissutigaa ilinniaqqiffinni ilinniartunut aqqutissiuussisut pikkorissarneqartartut ilinniartut nappaammik suussusersineqarsimasut tapersersorneqarnissaat pillugu, tamannalu Nuna Tamakkerlugu Ilitsersuisarfik peqatigalugu ingerlanneqartartoq.