Ilinniartut erninermut atatillugu ilinniarunnaarallartut kollegieniiginnarsinnaalissapput
Ilinniartut, erninermut atatillugu sulinngiffeqarniartut inatsit maanna atuuttoq malillugu, ilinniartut inaanni inigisaminnit anisariaqartarput. Naalakkersuisut inatsimmut allannguutissamik siunnersuuteqarput.
Ilinniartut naartusut erninermullu atatillugu sulinngiffeqarniartut, erninermut atatillugu ilinniarnerminnik unitsitsigallarnerminni ilinniartut inaanni najugaqarnerminnik annaasaqarnissamik ernumasariaarutissapput.
Ilinniartitaanermut Naalakkersuisoq, Peter Olsen (IA) ilinniartut ineqarfii pillugit inatsisartut inatsisaata allanngortinissaanut sisamanngornermi siunnersuuteqarpoq, ilinniartut erninermut atatillugu iliniakkaminnik unitsitsigallartut ilinniartut inaanni najugaqaannartalernissaat anguniarlugu.
- Erninermut atatillugu sulinngiffeqarnermi ilinniartut ineqarfianni najugaqaannarsinnaanermut periarfissaq ilinniartup ilinniakkamik naammassinnissinnaanissaanut periarfissanik tapersersuissaaq, ilinniartitaanermut naalakkersuisoq siunnersuummut oqaaseqaatimini allappoq.
Anaananngortut anisitaasartut
Inatsit maanna atuuttoq malillugu ilinniartoq ilinniartut inaanni ineqarsinnaanngilaq ilinniakkaminik unitsitsigallaruni, aamma erninermut atatillugu.
Sermitsiaq.AG-p siornatigut allaaserereerpaa Ilisimatusarfimmi ilinniartut peqatigiiffiat Pitaq allagaqartoq angajoqqaanngortussat ernereernerminni ilinniaannarnissamik ingerlatsiniarlutik aalajangertartut, inigisartik annaajumanagu. Allalli illoqarfigisaminnut angerlaannartarput erninermut atatillugu sulinngiffeqarusullutik.
Tamanit taperserneqartoq
Inatsisartut ilinniartitaanermut ataatsimiititaliap oqariartuutigaa inatsit allanngortittariaqartoq.
Inatsimmi allannguutissaq allanngortinneqassappat, 1. juli 2022 allannguut atuutsinneqalissaaq.
Inatsimmi allannguutissatut siunnersuut siullermeerneqarami allanngortinnissaa taperserneqarpoq. Partiit tamarmik siunnersuut ataatsimiititaliami suliarineqassasoq innersuussutigaat.
Taama aalajangertoqarnera Soriina Davidsenip, ilinniartut sinnerlugit allagaqarsimasup nuannaarutigaa. Taassuma Inatsisartut ataatsimiinnerat malinnaavigisimavaa.
- Siunnersuutip taperserneqarnera iluarisimaarparput. Eqqumiigaarpulli Inatsisartuni ilaannit ilinniartut inaanni inissaaruttussat eqqaaneqarmata. Uagut soqutigilluinnarparput ilinniakkaminnik aallartitsereersut naammassinninnissaat, aamma ilinniarnerup nalaani angajoqqaanngoraluarunilluunniit, Soriina Davidsen oqarpoq.
Semesterimi ataatsimi ernisussat sisamat
Taanna ilisimatitsivoq allakkiap siorna suliarineqarnerani paasisimallugu ilinniartut sisamat erninissartik pillugu iniminnit aninissaminnut aarlerisut.
Allannguutissatut siunnersuut ataatsimiititaliami suliarineqartussanngorlugu innersuunneqarpoq. Aappassaanik ataatsimiissutigineqassaaq 21. april pingajussaaneerneqassallunilu 28. april.