Ilinniartut arlaannaalluunniit danskisut ilinniarasuarnissamut peqataaniarluni nalunaarsimanngilaq
Kalaallit inuusuttut Danmarkimi ilinniarnerminnik aallartilluarnissaat anguniarlugu danskisut pikkorissaaneq ikiuutaaniartussaagaluarpoq. Pikkorissarnissamulli periarfissaq siorna neqeroorutigeqqaarneqarmat arlaannaalluunniit peqataaniarluni nalunaaruteqarsimanngilaq
Kalaallit danskisut ilinniarasuarsinnaanerat siorna aggustusip qaammataani siullermeerluni ingerlanneqartussanngormat peqataaniarluni nalunaartoqarsimanngilaq. KNR oqaluttuarpoq.
2019-imut aningaasanut inatsisip suliarineqarneranut atatillugu folketingimi 3 millioner koruunit 2019-2022-mi pikkorissartitsinissamut immikkoortinneqarput. Taamatut suliniuteqarnikkut sunertaavoq inuusuttut Kalaallit Nunaanneersut ilinniakkaminnik aallartilluarnissaat ilinniakkamillu unitsitsiinnartarnerup akiorniarneqarnissaa.
Arlaannaataluunniit neqeroorummut qinnuteqarsimannginnerannut pissutaagunarpoq, pikkorissaanissap ilisimaneqarsimannginnera, Københavns Universitetimit taamatut naliliisoqarpoq.
- Pikkorissartitsinissap piareersarnissaanut piffisakinnera ilaatigut pissutaavoq, pikkorissartitsineq aggustimi pisussaasarpoq ilaalu nittartagaq atorlugu juulimi aallartereertarluni, pikkorissartitsinissallu kalaallinut ilinniartunut aamma ussassaarutiginissaa. Taamaammat ilimagaara qinnuteqartoqannginneranut pikkorissarnerup ilisimaneqannginnera pissutaasut ilarujussuarigaa, Københavnip Universitetiani nunarsuarmioqataalersitsinissamut oqaatsinillu arlariissaqarnermut sullissivimmi aqutsisoq Helle Sværke KNR-imut oqarpoq.
Pikkorissaanissamik aaqqissuisut upernaaru Kalaallit Nunaanni ilinniarnertuunngorniarfiit tikeraarniarpaat, pikkorissaanissaq ilinniartunut pitsaanerusumik nittarsaanniarlugu.