Ilinniartitsisutut ilinniarfimmut qinnuteqartorpassuit
Ilinniartitsisunngorniarlutik ilinnialerusuttut amerleriarujussuarput. 2017-imi 58-it qinnuteqarput 30-t akuerineqarput. Ukioq manna 90-it qinnuteqarput, maannamullu 59-t akuerisaasussatut inissisimapput.
Qineqqusaarnerup nalaani ilinniartitsisunik piukkunnaatilinnik amigaateqarneq annertuumik oqallisigineqarpoq. Ilinniarfissuarmi ilinnialernissamut piumasaqaatit apparneqarnissaannut siunnersuut ataaseq sakkortuumik isornartorsiorneqarpoq, kisianni Ilinniartitsinermi Ilisimatusarfiup politikkikkut oqallinneq malinnaaffigaat, akuerisaanissamullu piumasaqaatit aaqqillugit.
Kajumissutsimik qinnuteqartut
- Siornamut sanilliullugu qinnuteqartut qinnuteqaatiminnik tunngavilersuinerat isiginiartarpagut. Imaassinnaasoq inuk karakterinik amigartuulaartoq, kisianni suliffimmik misilittagaqarnerminik uppernarsaasinnaasoq, taamaalillunilu pineqartoq ilinniarfimmi ilinnialersinnaanermut tulluartuusoq, Ilinniartitsinermi Ilisimatusarfimmi pisortaq Britta Lohmann, Sermitsiaq.AG-mut taama oqarpoq.
Nuummi GUX-imi rektorip Mikael Enggaardip ilinniarnertuunngorniarfimmi karakterit ukiumut angusat qaffakkiartuaartut tamatuma saniatigut ilisimatitsissutigaa.
GUX: Ineriartorneq nuannersoq
- Ineriartorneq nuannerpoq. Imaanngilaq agguaqatigiisillugu karakteritigut angusat qaffariarujussuartut, kisianni ukiumiit ukiumut qaffakkiartornera takusinnaavarput, Mikael Enggaard Sermitsisaq.AG-mut oqarpoq.
Ilinniartitsisutut ilinniarfimmi ilinnialerniarlutik akuerineqartut amerlassusaat pillugu Britta Lohmann ima oqarpoq:
- Kisianni maanna qinnuteqartut amerlassusaanni maluginiartariaqarpoq, ilinniarnertuunngorniartut karakterini ukiumut angusaannik kisimi tunngaveqarnerat. Aasaanera sioqqullugu ilinniarnertuunngunnginnerminni angusinngitsoorunik, taava ilinniartitsisutut ilinnialernissaminnut inissartik annaassavaat, Britta Lohmann nassuiaavoq, taassuma tamatuma saniatigut oqaatigaa, septembarip aallaqqaataani ilinniartitsisunngorniarlutik ilinnialertussat amerlassusaat takuneqarsinnaalissasoq.
Eqqissiallattoqarsimasoq
- Soorunami piukkunnartunik amerlanerujussuarnik qinnuteqartoqarnerput pitsaasuuvoq. Siorna ilinnialernissamut piumasaqaatit allanngortereeratsigit, ilinniarfimmi eqqissiallattoqarnikuuneranik tamanna pissuteqartoq isumaqarpunga, ilinniarfimmi pisortaq oqarpoq.
Ilinniartitsisunngorniat amerlanissaat inuiaqatigiinnut pingaaruteqarpoq, tassami ukiut qulit qaangiuppata ilinniartitsisut 300-t amigaatigineqarnissaat missingersuutit takutippaat.