Ilinniartitsisut: Coronartoqareernerata kingorna atuartitsineq pitsaanerulerpoq

- Atuartitsiffiusup ilua eqqissisimaneruvoq, ilinniagaqarnissaq taamaasilluni oqinnerulerluni. Ilinniartitsisumit aamma ikiorluarneqarnerusinnaalernikuuvunga.

Coronartoqareenerata kingorna atualeqqissimaneq pillugu Nuummi Atuarfik Samuel Kleinschmidtimi 5. B-mi atuartoq Tanja Hansen oqarpoq.

Meeqqat atuariartoqqimmata atuaqatigiiaat agguarneqarput, assersuutigalugu amerlanerpaamik atuartut aqqanillit atuaqatigiissinnaallutik. Atuartitsinissaq taamaasilluni oqinnerulersoq ilinniartitsisup Susanne Storgaardip aamma socialpædagogip Patricia Hansenip, ASK-imi atorfeqartut, Sermitsiaq.AG-mut oqaatigaat.

Atuartut eqqissisimanerusut

Atuartut ullup affaa atuartinneqartarput, 1. klassimit 5. klassi ilanngullugu arfineq pingasunit ullup qeqqata qeqqa tungaanut atuartinneqartarput, 6. klassimit 10. klassi ilanngullugu atuartut ataatsip qeqqanit sisamat qeqqata tungaanut atuartinneqartarlutik.

- Atuartut eqqissisimanerujussuulernikuupput. Sammineqartut itinerujussuarmik sammineqartalerput, atuaqatigiit ikinnerunertik pissutigalugu ilikkagaqarluarnerusalertut malunnaqaaq. Ilinniartitsisut oqinnerusumik ilinniartitsisinnaalernikuupput, atuartummi piffissaqarluarfigineqalernikuupput. Taamatut atuartitseriaaseqalertoqarnera pissutaalluni atuartut nuannaarnerulertut malunnarpoq, ilinniartitsisoq Susanne Storgaard oqaluttuarpoq.

Atuaqatigiiaat 24-25-iugallarmata atuartut tamaasa tikinnissaat ajornartarsimasoq oqaatigaa.

- Atuartut maanna piginnaasaat annertunerulereeqaat, ilinniartitsinerput aamma pitsaanerulernikooqaaq. Siornatigut atuartut saqqumilaanngitsut manna soqutiginninnerulernikuupput, nappaasalerlutik oqaasissaqartalerlutillu. Maanna atuartut piffissaqarfigineqarneruleramik ilikkagaqarnerusalersut malugaarput. Soorunami coronartoqannginnerani atuartut aamma ilikkagaqartarput, maannali atuaqatigiiaat ikinnerulernikuugamik ilinniartitsisumiillu piffissaqarluarfigineqarneruleramik soqutiginninnerulerput - tamanna siornatigut malugisimanngilarput, Susanne Storgaard oqaluttuarpoq.

Nukissaqarnerulerneq

Atuarfiup iluani aamma maanna kisimi atuartitsisoqartarunnaarpoq.

- Assersuutigalugu qaqqaliartarpugut, imaluunniit arlaannik soqutiginartunik suliaqarluta, aamma soorlu katersugaasivimmi atuartitsisoqartalerpoq, tassani qanga kalaallit atuartitsissutigineqartalerlutik. Taamatut atuartitsinermi atuartut ilikkagaqartaqaat. Tassungalu pissutaavoq atuartut ikinnerunerat, atuartut 20-it qaangeraangassuk taamatut atuartitsisoqarsinnaarpiarneq ajorpoq eqqissiviittoqartarnera pissutigalugu, Susanne Storgaard oqarpoq.

Atuartut atuaqatigiiaani amerlannginnerat siuariaataalluartoq tikkuarpaa.

- Atuartut ineriartorluarput, atuariartornissartik qilanaarisalerlugu. Ilinniartitsisoqatigut aamma qiimanerulerput atuartitsinissamut nukissaqarnerulerlutik. Ukiuni 15-ni ilinniartitsisooreerpunga, assingusumik misigisaqarsimanngisaannarpunga. Suleqatikka uattulli aamma misigipput, tamanna nuanneqaaq misigalugu, qungujulluni oqarpoq.

Atuartut ammanerulersimasut Patricia Hansenip malugaa.

- Atuaqatigiit ikinnerunertik pissutigalugu atuartut amerlanerusunik oqalliseqalersinnaalerput, ammanerulernikuupput, misigisatik nuannersuinnaanngitsut oqaluuserilersinnaalerlugit. Aamma atuaqatigiiaat iluini ajornartorsiutit anigorneqapallattalernikuupput, tamanna atuaqatigiillualernerannut sunniuteqaqataalluarpoq, oqarpoq.

Politikerinut oqariartuut

Coronartoqarnera qaangiuppat ineriartornerup attatiinnarneqarnissaa neriuutigaat.

- Qanoq una piffissaq atorluarneqarsinnaanersoq paasiniarneqartariaqarpoq, aamma qanoq ineriartorteqqinneqarsinnaanersoq eqqarsaatigineqartariaqarpoq, oqarput.

- Atuaqatigiiaat siunissami ikilineqartuuppata inuiaqatigiinnut pitsaasumik sunniuteqarluassaaq. Atuarfeqarfinnut tunngatillugu ingerlatsisut politikerillu maanna misilittagarineqalersut atorluartariaqarpaat, siunissami atuarfiit ilusissaannut atorluarneqarsinnaasunik maanna ulikkaarmat, Susanne Storgaard aamma Patricia Hansen oqarput.