Skip to main content

Ilinniartitsisut uippakajaartut: Sinissaarunneq misigissutsillu allanngoqqajaasartut

Tarnip pissusaanik immikkut ilisimasallip misissuinerata takutippaa ilinniartitsisut sisamaagaangata ataaseq sinissaarunnermik, isummaminik allanngortitsisaqattaarnermik aamma suliat ataatsimut isiginiarnerinik ajornartorsiuteqartartoq. Tamakku uippakajaarnermut ersiutaasarput.

Atuartitsineq taassumallu tungaanut piareersangassarpassuit ilinniartitsisunut assoroortitserujussuarsinnaasarput.

Ilinniartitsisut sisamaagaangata ataaseq annerusumik minnerusumilluunniit uippakajaarnermik eqqorneqartarpoq. Misissuineq, IMAK-ip ukiup affaani kingullermi ingerlassimasaa taama takutitsivoq.

- Ilaasortatta taama amerlatigisut suliffitsik pillugu ilungersortinneqarnerat ernumanarpoq. Tamannalu iliuuseqarfigisariaqarparput, sulisitsisut kajumissaarpakka uippakajaarneq annikillisinniarlugu sulliviup iluani avatagiisit pitsaasuunissaat anguniarlugu akisussaaffimmik tiguseqqullugit, IMAK-ip siulittaasua, Birthe Møller Therkildsen tusagassiorfinnut nalunaaruteqarluni allappoq.

IMAK-imi ilaasortat 446-t misissuinermi peqataapput. Taakku 23 procentii, tassa sisamaagaangata ataaseq, akipput minnerusumik annerusumilluunniit, uippakajaarnermik eqqorneqarsimalluni ersiuteqartarluni. IMAK 1.000-it missaanni ilaasortaqarpoq.

Sinissinnaannginneq misigissutsillu allanngoqqajaaneri

Apersorneqartut uippakajaarnermut ersiutit arlallit misigisarpaat.

- Sinissaarunneq, misigissutsit allanngoqqajaasarnerat, timikkut allatigut uippakajaarnermut ersiutit, suliallu tamakkerlugit isiginiarsinnaaneri eqqaamasinnaanerilu, uippakajaarnermut ersiutaakkajupput IMAK-ip ilaasortaani, misissuinermi inerniliunneqarpoq.

Misissuinermi erseqqissarneqarpoq Kalaallit Nunaanni uippakajaarnerup qanoq atungaatiginera pillugu misissuisoqarsimanngimmat, ilinniartitsisut akornanni uippakajaarnerup atugaanera allanut sanillersuunneqarsinnaanngitsoq.

Pingasuugaangata ataaseq ikiorneqartarpoq

IMAK suliffiup pitsaanerulernissaanik siusinnerusukkut piumasaqartarsimavoq. Misissuinerup takutippaa uippakajaarnermik misigisaqarsimasut akornanni, ilaasortat pingasuugaangata taamaallaat ataaseq, tassa 29 procentii, uippakajaarneq pillugu ikiorneqarnissamik neqeroorfigineqarsimasartoq.

- Tamanna naammaginanngilaq taamaallaat pingajoraarterutaat inulaarlugu uippakajaarnermik nalaataqartunit, sulisitsisuminnik uippakkajaarneq pillugu iliuuseqarfiginiarneqarsimaneri, Birthe Møller Therkildsen oqarpoq.

Taassuma sulisitsisut kaammattorpai suliffeqarfiup pitsaanerulernissaanik ukkasseqqullugit, ilinniartitsisullu annerusumik minnerusumilluunniit uippakajaarnermik misigisaqarpata ikiornissaannik neqerooqqusilluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER