Ilinniartitsisut soraajortortut: Ukiuni atuarfiusuni marlunni ilinniartitsisut affaat taarsersimasut
Nuummi Atuarfik Hans Lyngemi ilinniartitsisut atorfeqartut 48-ni 26-it ukiuni atuarfiusuni marlunni kingullerni soraarsimapput. Atuarfiup pisortaata pissutsit oqaaseqarfigissanagit ilisimatitsivoq.
Atuarfik Hans Lyngemi ukiuni atuarfiusuni marlunni kingullerni ilinniartitsisut katillugit 26-it soraarniuteqarsimapput.
Atorfimmit soraarniuteqarnerit pillugit kisitsisit Sermitsiaq.AG-p Kommuneqarfik Sermersuumut piniarsimasaani tamanna takuneqarsinnaavoq.
Ukioq atuarfiusoq 2021/2022-mi ilinniartitsisut qulit soraarniuteqarsimapput. Ukioq atuarfiusumi 2022/2023-mi ilinniartitsisut 16-it soraarniuteqarsimallutik.
Kommuneqarfik Sermersuumi ilinniartitsisunik pisariaqartitsinermik nalilersuinerup takutippaa Atuarfik Hans Lyngemi ilinniartitsisut 48-it atorfeqartussatut nalilerneqarsimasut.
Sermitsiaq.AG-p atuarfiup pisortaa kisitsisit pillugit oqaaseqartikkumasimavaa. Atuarfik Hans Lyngemili pisortap pissutsit oqaaseqarfiginissaat kissaatiginngilaa, Kommuneqarfik Sermersuumili atuarfeqarnermi fagchefimut innersuussilluni.
Atuarfinnut allanut sanilliullugu soraartut amerlanerusut
Ilinniartitsisut taarseraannerujussuat isumaqarpoq atuartut ukiumut arlaleriarlutik nutaamik ilinniartitsisortaartariaqartarput paarlatsimiilluunniit atuartinneqarlutik.
Kommuneqarfik Sermersuumi atuarfeqarnermut immikkoortortami fagchef Riikki Grønvold ilisimatitsivoq soraarnerit ilaat isumaqarsinnaasut kommunip atuarfimmi allami atorfinittussanngortinneqarnermi nuunnerit.
Nuummi meeqqat atuarfii kommunip ataaniittut tamarmik ilinniartitsisunik 47-t aamma 59-it akornanni atorfeqartussatut naatsorsuunneqarput. Atuarfik Hans Lyngemit ilinniartitsisut soraartut Nuummi atuarfiit sisamat sinnerini soraartunit amerlanerujussuupput.
Atuarfinni soraarniuteqartut katillugit:
- Atuarfik Hans Lynge: 2021-2023-mi 26-it
- Nuussuup Atuarfia: 2021-2023-mi arfinillit
- Kangillinnguit Atuarfiat: 2021-2023-mi arfineq-pingasut
- USK: 2021-2023-imi 13-it
- ASK: 2021-2023-mi aqqanillit
