Ilinniartitsisut Kommuneqarfik Sermersooq suli iluaagaat

- Kommuneqarfik Sermersuup sipaarniarnermut atatillugu piumasaqaataat pappilissatigut anngunneqartarsimasuuppata pitsaanerusimassagaluarpoq. Nalunannginnerusimassagaluarpoq suna oqallisigineqassanersoq, taamaattumik ilinniartitsisunit paatsiveersusimaartoqarlunilu iluaalliortoqarpoq.

Ilinniartitsisut, tatigisaalluni sinniisoq Atuarfik Ukaliusamilu sinniisuusit ilaasortallu ataatsimut allapput. Kommuneqarfik Sermersuup atuarfeqarfinnut 10,5 million koruuninik sipaarniarnera pillugu akerliussutsimik takutitsisoqareerpoq.

Atuarfik Ukaliusamit tusagassiutinut nalunaarut:

Oqaatigineqartoq siulleq:

MISImi sulisut 16-iupput soraarsitsisoqareerpallu 12-nik sulisoqalissaaq. Isummersunnginnitsinni kisitsisit taaneqartut paasiniaaffigaagut.

Oqaatigineqartut aappaat:

Kommuneqarfik Sermersuup atuarfeqarnermut pisortaa Hans Peter Brobergip oqaatigereerpaa ilinniartitsisut 15-16-it soraarsinneqassasut kiisalu ilinniartitsisut overtiimertassanngitsut oqaatigalugu. Ilinniartitsisut taakku 15-16-it ukiumi atuarfiusumi 2014/15-imi suut suliassaagalui unitsiinnarneqassanersut apeqquteqarpugut. Ilisimatinneqarpugut specialklassini atuartut ukiut tamaasa aallaarsimaartassanngitsut kisiannilu atuarnerminni ataasiaannarlutik aallaarsimaarumaartut nalunaarutigineqarpoq. Allamik itinerusumik akissuteqartoqanngilaq.

Oqaatigineqartut pingajuat:

Ilinniartitsisut illoqarfimmit nunaqarfimmiilluunniit nuutsitaasoqarsinnaanngilaq. Aqutsisoqarfimmiilli qunusaarisoqarnera malugaarput. Ilinniartitsisut marluk apeqquteqarnikuupput atuarfimmut allamut nuukkusunngippata soraarsitaassanersut. Atuarfeqarnermut pisortap Hans Peter Brobergip akivai "aap".

Hans Peter Brobergip Atuarfik Ukaliusamut pulaarnermini ilinniartitsisut taamaasa tusaavaat soraarsitsisoqarumaartoq. Sermitsiaq.AG-mi oqaaseqarneput silaannarminngaanniit tigusaanngillat, kommunimmi aqutsisoqarfianinngaanniit taakku anninneqarput.

Oqaatigineqartut sisamaat:

Kikkut ilinniaqqissappat ukiumi 2014-imi? Aqutsisoqarfimmi aamma tamanna atuutsinneqalissava? Atuarfeqarfimmi ilinniaqqinnissat pillugit aatsaat pilersaarusiortoqalernera tupigusuutigaarput.

Ilinniagarisimasat aqutsisoqarfimmit apeqquserneqarmata tupigaarput, tamanna kommunimi nalunaarsimaffimmi takuneqarsinnaannginnerami?

Ilinniartitsisut ilaat ilinniaqqinnermi affaanut tikeruttornermi uniinnartariaqassapput naammassinngitsoorlutillu. Ilinniartitsisut amerlasuut ilinniaqqinnertik nukippassuarnik atortarpaat, taamaammat unititsiinnartariaqarnerat paasiuminaappoq.

Ilinniartitsisut 14-it ukiumi 2013-imi ilinniartitaanermut naalakkersuisumut allagaqarput ilaatigut suleqatigiinnerulertoqarnissaa ujartorneqarluni. Angajoqqaat politikkerillu akisussaaffeqarnerulernissaat aamma ujartorneqarluni. Atuarfinnut nukissanik amerlanerusunik taamaalilluni ujarlertoqaraluarluni. Taamaammat ilinniartitsisut ingerlaqqittarnerat pingaaruteqaraluarpoq, tamannami atuartunut, ilinniartitsisunut, atuarfimmut, suleqatinut inuiaqatigiinnullu iluaqutaasarmat. Taamaammat paasiuminaappoq sooq Kommuneqarfik Sermersuup ilinniartitsisunik ilinniaqqittunik unititsiinnarnera.

Oqaatigineqartut tallimaat:

TR-ip suliassaraa ilinniarnersiuteqartarnerit, HSU-mimi ataatsimiittoqarnerani ilinniagaqarnersiutit eqqartorneqarput, tamakku aamma sipaarniarnermut attuumassuteqarnerlutik? Aqutsisoqarfimmit tamakku aqulluarneqarsinnaannginnamik?

Qaqagumita apeqqutit akineqassappat? HSU-p siunersuusiornissat suliarisussaangilaa? HSU-mi kingullermik 11/2-14-imi ataatsimiittoqarpoq kingullermik, tassani sipaarniarnerit akuersaarneqareerput. Aalajangerneqareersumut qanoq sunniuteqartoqarsinnaanersoq Kommuneqarfik Sermersuumit qanoq isigineqarpa?

Atuarfinnut aqutsisoqarfik suleqatigaarput ilinniagaqarnersiutillu pillugit anguneqartut nuannaarutigaagut. Akerliussutsimik takutitsinermili atuarfeqarfinnut aqutsisoqardimmit tusagaqanngilagut, kisimi tusagassiuutitigut tusagaqarluta.

Kommuneqarfik Sermersuumi atuarfeqarfinnut aqutsisoqarfiup suleriaasaa oqaaseqarfigerusupparput. Kommunalbestyrelsimit aqutsisoqarfimmiillut ilinniartitsisunut ammut isiginnittoqarnera ajuusaarnarpoq. Ilinniartitsisut tusagassiuutinut eqqunngitsumik oqaaseqartutut aqutsisoqarfimmit nalilerneqarput. Neriuutigaarput aqutsisoqarfimmit utoqqatsissummik nassissisoqarumaartoq, tassami kukkusumik tamanna pillugu iliortoqarpoq.

Innuttaasunut ammasumik ataatsimiittoqarnissaanut qilanaarpugut, Kommuneqarfik Sermersuumiilli aamma qaaqquneqarnissarput kissaatigigaluarparput. Tusagassiutit nalunaarutitiguinnaq suleqatigiittoqarsinnaanngitsoq Asii Chemnitz Naruppimut naggataasigut oqarusuppugut', Ilinniartitsisut, tatigisaalluni sinniisoq Atuarfik Ukaliusamilu sinniisuusit ilaasortallu ataatsimut allapput.