Skip to main content

Ilinniartitsisut isumaqatigiissut akuersissutigaat

IMAK-ip aamma Namminersorlutik Oqartussat akornanni isumaqatigiissut maajip 19-ani atsiorpaat. Maannalu IMAK-imi ilaasortat isumaqatigiissut akuersissutigalugu. Tunngaviusumik akissarsiaat katillugit 5,5 procentimik qaffapput.

Ilinniartitsisut kattuffiat isumaqatiginninniarneq maajip aallartinnerani aallartippaat. Isumaqatigiissullu naammassillugu maajip 19-ani atsiorlugu. Maanna IMAK-imi ilaasortat amerlanerussuteqarnerungaartut taasinerminni isumaqatigiissut akuersissutigaat. Ilaasortat taasisinnaanerat juunip 14-ani killeqarpoq. 

Isumaqatigiissummi ilaatigut anguneqarpoq tunngaviusumik akissarsiat ukiunik sisamanit sivisussuseqartussap 5,5 procentimik qaffanneqarnera. 

- Nuannaarutigalugu nalunaarutigisinnaavarput, 2021-mut isumaqatigiissut pillugu ilaasortanik taasititsineq maanna naammassimmat. Ilaasortatta akissarsiat piviusumik qaffanneqarnissaannik kissaataat tusarnaarsimavarput. Amerlanerussuteqarluartut akuersaarnerminnik ilalersimavaatigut, maannalu Namminersorlutik Oqartussani taasissutiginninnissaq utaqqimaaginnalerparput, IMAK-ip siulittaasua, Birthe Therkildsen, oqarpoq.

Tunngaviusumik akissarsiat saniatigut atuarfinnut tapisiat tapisiallu sinneri allat 5,4 procentimik qaffanneqarnerat. Piukkunnassutsimullu tapisiat 100 procentimik qaffanneqarput, tassa ima paasillugu marloriaataasumik qaffattut. Isumaqatigiissut 2025-ip tungaanut atuuttussap iluani aamma nutaamik pilersitsisoqarpoq. Tassami ilinniakkanik arlalinnut piukkunnassutsimut tapisiat nutaat pilersinneqarmata. 

Uippakajaarneq ukkanneqarpoq

Isumaqatiginninniarnerup iluani illuatungeriit uippakajaarneq pillugu ullup ataatsip iluani oqalliseqarput. Uippakajaarnermi pillugu IMAK misissuititsinerata takutippaa ilinniartitsisut sisamaagaangata ataaseq uippakajaanermik eqqugaasartoq. 

- Uippakajaarneq isumaqatiginninniarnermi oqallisigineqarnissaa sinniisoqarfitta ataatsimeeqatiginerani kissaatiginikuuaat. Ilinniartitsisut amerlavallaartut uippakajaarnermik eqqugaasarput ilaasortagullu arlaleriarlutik oqariartuutigisarpaat atuarfinni uippakajaarnermik eqqugaasartut amerlavallaartut. Naak kommuunini uippakajaanermik politikkeqaraluartoq qanoq atorneqarsinnaanera erseqqarinngilaq. Taamaammat isumaqatigiippugut taassuma atortalernissaanut aqqutissiuinerit siunnersuinerillu amerlanerit Namminersorlutik Oqartussat suleqatiginerisigut anguniassallugu, Birthe Therkildsen oqarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER