Ilinniartitsisoq: Tasiilami meeqqanut iliuuseqarneq annikippallaarpoq
Meeqqanut kinguaassititigut kanngutsaatsuliorfigineqarsimasunut angalaqatigiinnik maanna aggertoqalernera pitsaavoq. Kisianni tamanna naammanngilluinnarpoq, Rikke Blegvad, kommunip meeqqanut suliniuteqarneranik siornatigut isornartorsiuereersoq isumaqarpoq.
Ukioq manna apriilimi ilinniartitsisoq siunnersortaasoq, Rikke Blegvad aarlerisaarivoq. Tasiilami meeqqanut atugarliortunut pisortat iliuuserisaat ajungaarmata sumiginnaasoqartoq, Sermitsiami isummersorluni allappoq.
- Suliassaqarfiup iluani allanngortitsisoqartinnagu, meeqqat aaqqissuussaanerup iluaneereersut nutaallu arlaqarnerusullu ”sumiginnagaasutut inissisimasut” aaqqissuussaanermi ataqatigiinnginnerpaami, peqqissaannginnerpaami inuppalaannginnerpaamilu sumiginnaaqqinnissamut piareersimaannassapput, taanna taamani ilanngussamini allappoq.
Rikke Blegvad ukiuni arfinilinni Tasiilami ilinniartitsisuuvoq, taakkunannga ukiuni tallimani siunnersuisartuulluni, tamannalu aamma inunnik isumaginnittoqarfimmik suleqateqarnermik ilaqarpoq. Tassani sullissisut ataatsimiinnernik pingaarutilinnut takkutinngitsoortarput, amerlasuutigut nalunaaruteqaratik.
Maanna meeqqanik atornerlugaasimasunut katsorsaasussanik angalaqatigiinnik pilersitsisoqarnikuuvoq.
- Tasiilamnut maanna angalaqatigiinnik aallartitsisoqalernera pitsaasuuvoq, ajornartorsiutilli annertuut aaqqiiviginissaannut naammanngilluinnarpoq, Rikke Blegvad Sermitsiaq.AG-mut oqarpoq.
Meeqqat tamarmik ikiorneqanngitsut
Angalaqatigiit tassaapput psykoterapeutit marluk, taakku ukiumi aggersumi illoqarfik sapaatip-akunnera qaammatit tamaasa tikeraartassavaat. Taakku illoqarfimmeersunit marlunnit suleqateqassapput.
Rikke Blegvadip ilannguissamini 2016-imi januaarimit ukiormanna apriilimut atuarfimmit 230-nik sumiginnaasunik nalunaaruteqartoqarsimasoq allaaseraa, meeqqat inuusuttullu imminut toqunnissaminnik eqqarsaateqartut, angerlarsimaffinni ernguttut, angerlarsimaffimmi nakuusertut aamma kinguaassiutitigut kanngutsaatsuliornerit pineqarlutik.
Angalaqatigiit meeqqanut kinguaassiutimikkut kanngutsaatsuliorfigineqarsimasunut neqeroorutaapput.
- Tamatuma saniatigut meeqqanut allanik ajornartorsiutinik misigisaqartunut ikiorsiissuteqartoqarnissaanik amigaateqartoqarpoq, Rikke Blegvad oqarpoq.
Sullissisut ikippallaartut
Taanna Tasiilamiikkallarami sullissineq sammiveqanngitsoq misigaa, nalunaaruteqartut nakkutigineqarnerat pitsaanngilluinnarluni.
- Sullissinertaanut sulisut amerlanerunissaat suli amigaatigaara. Tassanngaanniimmi meeqamut suliniuteqarneq aallartittarpoq.
Rikke Blegvadip ilanngutassiaqarnerata kingorna, Kommuneqarfik Sermersuumi isumaginninnermut pisortaq, Martha Lund Olsen akissuteqarpoq, apriilimi innersuussisoqatigiit pilersinneqarsimanerarlugit, taakku nalunaarutit tamaasa isumagisassavaat. Tamatuma suliat tamarmik iluamik tiguneqartarnissaat qulakkiissavaat, kiisalu iliuuseqartoqassalluni.
- Nuummi ataatsimut innersuussisoqatigiinnik pilersitsisoqarnera alloriarneruvoq. Kisianni nalunaaqutit tululiaqutigalugit iliuuseqartoqarnissaa pingaaruteqarpoq. Suliat amerlangaarmata sulianik suli tulleriiaarisoqartariaqartoq paasitinneqarnikuuvunga, Rikke Blegvad oqarpoq.
Taanna juunip naanerani Tasiilamit nuuppoq. Kisianni meeqqat eqqarsaatigalugit iliuuseqarnerup maannamut nalunaarutigineqareertut sinnerlugit nukittorsarneqarnissaa neriuutigaa.
- Ungasissoq eqqarsaatigalugu iliuuseqartoqarnissaanik ujartuivunga. Taamaaliortoqalernera takusinnaanngilara.