Ilinniartitsisoq: Angerlarsimaffimmiit atuartitsineq ingerlalluartoq
Nuna tamakkerlugu ilinniartitsisorpassuit angerlarsimaffimmiit atuartitsisinnaaneq suliaminni misilittakkatut ilanngussinnaalerpaat. Sapaatit akunnerili kingulliit unammillernartoqarsimapput.
Unammillernartoq naammassineqartariaqartoq.
Atuarfik Hans Lyngemi angajullerni ilinniartitsisuni aqutsisoq, Vivi Heilmann angerlarsimalluni atuartunut atuartitsineq taama nalilerumavaa. Ulluni atuartitsiviusuni aqqaneq-marlunni kingullerni Ipadsikkut app-it Zoom aamma Showbie atorlugit atuartitsisoqareerpoq. App-it teknologimik ilisimasaqarluarnermik internetimullu attaveqarnissamik piumasaqartuupput.
- Tassanngaannartorujussuarmik angerlarsimaffimmiit atuartitsineq atulerparput, Nuuk matuneqarmat. Taannali sioqqullugu piareersaalersimavugut, takusinnaagatsigu Danmarkimi coronavirus siaruapiloortoq, Vivi Heilmann Sermitsiaq.AG-mut oqarpoq.
- Soorunami ilinniartitsisut ilaannut aallaqqaammut unammillernartoqarsimavoq. Tamanna allaqqunneqarsinnaanngilaq. Ataatsimulli isigalugu ingerlalluarpoq, oqarpoq.
Ajutoornermi iluatsitsineq
Atuarfiit amerlalluinnartut atuartitsinermi ipadsinik atuinerat ukiuni kingullerni annertusiartorsimavoq. Atuartut app-imi mappeusumi, showbiemik taaguuteqartumi, ilinniagassaqarsinnaapput. AHL-imi ilinniartitsisut akuttunngitsumik pædagogisk dageqarnerminni atuartitsinermi ipadsit atornerunissaannik eqqartuisarput.
- Ajutoornermi iluatsitsineq, ilisimanngisatsinnimmi piareersarluarsimavugut, Vivi Heilmann oqarpoq. Vivi Heilmann suliniummi Kivitsisami, Ipadsinik atuinermi ilinniartitsisunut ikiortitut inissisimavoq.
- Atuakkat suliassallu arlalissuit skannertariaqarsimavagut, atuartut angerlarsimaffimminni toqqissillutik suliassaqartikkumallugit. Nittartakkat soorlu clio.dk, atuartut suliassaannik neqeroortartut, Danmarkimi atuarfiit matooralernerini atorneqarpallaarlutik atoruminaallisimasut takusinnaasimavagut, oqaluttuarpoq.
Atuartut suleriusaat nikinngilaq
Vivi Heilmann, AHL-imi angajullerni aqutsisuusoq oqaluttuarpoq matugallarnerup nalaani atuartut sulisarnerat nikissimanngitsoq.
- Takusinnaalereerparput atuartut atuarfimmi suliaqarluartartut, aamma angerlarsimaffimminniit suliaqarluarsinnaasut.
- Ilinniartitsisut tungitsinniit suliagut aaqqiivigisariaqarsimavagut. Aallarteqqaaratta suliassarpassuarnik tunniussuussisarpugut. Tamannali allanngortittariaqarsimavarput, atuartut suliassaat annikillisillugit. Taamaasillutik atuartut amerlanerusut naammassinnillutik suliaqarsinnaalerput, Vivi oqarpoq.
Taanna ilisimatitsivoq Naalakkersuisut atuarfinnik ammaanissamik nalunaarnissaat atuarfiup utaqqigaa.
Matugallarneq sivitsorneqassappat suliakkiissutissat amerlanerusut piareersarneqartariaqarput.
Atuarfiilli ammaqqissappata, atuartitseriaatsini periarfissamik pitsassuarmik ilinniartitsisut tunineqarsimasut, Vivi Heilmann naliliivoq.
- Alimasissumik atuartitsineq siunissami atorneqarnerulissanersoq nalilersorneqartariaqarpoq. Takusinnaalereerparput iluatsissinnaasoq, oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...