Naalakkersuisut qanittukkut misissueqqissaarnerannit ilinniartitaanermi ajornartorsiortoqarneranik saqqummiussisoqarpoq.

”Kinguaariit allannguisut sunniutaat” annikilliartorsimavoq, ilinniarsimassutsillu qaffasissusaa appariarpoq.

Meeqqat atuarfianni aamma ukiuni kingullerni piginnaasat appariartorsimapput, taanna Naalakkersuisut Ilinniartitaanermut Pilersaarutaanni 2023-mi inerniliunneqartut ilagaat.

Ineriartorneq mumisinniarlugu Naalakkersuisut suliniutinik arlalinnik pilersaaruteqarput. Ilinniartitaanermut siunnersuisoqatigiit tassani ilanngunneqarput.

Naalakkersuinikkut atanngitsut

Siunnersuisoqatigiit naalakkersuinikkut arlaannaanulluunniit atassanngillat, siunnersuisoqatigiinnilu ilaasortat ilinniarsimassutsikkullu qaffasissumik tunuliaquteqarnissaat naatsorsuutigineqarpoq.

- Ilinniartitaanernut siunnersuisoqatigiit ilinniartitaanerit iluanni inassuteqaatissanik aalajangersimasunik tigussaasunillu suliaqartassapput, fagitigut qaffasinnerusumik inissisimanissat annertusaavigiumallugit, Ilinniartitaanermut Pilersaarummi taama allassimasoqarpoq.

Siunnersuisoqatigiit aningaasaliissutaasartut sapinngisamik sunniunneqarnerpaaffimminniittarnissaat peqataaffigissavaat, siunnersuisoqatigiit inuiaqatigiinni ilinniartitaaneq pillugu oqallinnermut aamma tapertaasassapput.

2023-mi siunnersuisoqatigiit pilersinneqarnissaannut sulinermut mio. kr.-t affaannik immikkoortitsisoqarpoq.

Najugarisaq qimannagu atuartitsinerup periarfissat naligiinnerulersissavai

Nunatta siunissami aningaasaqarnera qulakkeerusullugu Naalakkersuisut oqaatigaa, tassanilu sulisinnaasut ilinniarsimasut amerlinissaat aalajangiisuulluinnassaaq.

Ilinniartitaanermut Pilersaarut malillugu tamanna aaqqissuussamik ingerlatsilernissamik qularnaarisussamik meeqqat aamma inuusuttuaqqat innarluuteqartut ilinniartitaanerni periarfissaqalernissaannik pilersitsisoqassaaq. Najugarisaq qimannagu ungasianit atuartitsinermik atuineq siammarneqassaaq, amerlanerusut ilinniarnissamut periarfissikkumallugit:

- Nuttarsinnaassutsimut piumasaqaatit annertuujunerisa kingunerisaanik inuit ilaasa ilinniagaqarnissaq taamaatiinnartarpaat imaluunniit ilinniakkamik aallarteriikkamik taamaatitsiinnartarlutik. Ungasissumiittunik atuartitsisarnerup annertusisamik ilinniartitaanerup iluani ingerlatsivinni suniluunniit atorneqarsinnaanerata annertunerulersinneratigut aaqqissuussinerit eqaannerulersinneqarsinnaapput, inuillu ataasiakkaat ilinniagaqarnissamut pisariaqartitaannik naammassisaqartoqarsinnaalissalluni.

- Maanna ungasissumiittunik atuartitsisarnermut atatillugu pitsaasunik misilittagaqartoqalereerpoq meeqqat atuarfianni aamma ilinniarnertuunngorniarfinni. Anguniagaasoq tassaavoq kikkunnut tamanut assigiinnik periarfissaqartitsilernissaq, nunatsinni sumiluunniit najugaqaraluartut periarfissikkumallugit, Naalakkersuisut pilersaarummi allapput.