Ilinniartitaanermut pilersaarut anguniagartooq

“Ilinniartitaanermut Pilersaarut II – 2018” Ilinniartitaanermut Kultureqarnermut Ilageeqarnermullu Naalakkersuisoqarfimmiit saqqummiunneqarpoq, ukiunilu tulliuttuni arfinilinni ilinniarfinni pilersaarutinik innersuussutinillu arlalinnik imaqarpoq.

Meeqqat atuarfiat immikkut ukkatarineqartoq

Meeqqat atuarfiat immikkut ukkatariniarneqarpoq meeqqammi atuarfiini naammassinerup kingorna inuusuttuaqqanut ilinniartitaanernut ingerlariaqqinneq ajormata.

Inuusuttuaqqanut ilinniartitaanernut ingerlaqqittartut taamaallaat 10-15 procentii missaanniipput. Naak atuartut 40-45 procentii efterskolimi atuarnermik aallartitsisaraluartut, atuartut 40 procentiisa missaat meeqqat atuarfiata kingorna ukiup ataatsip qaangiunnerani inuusuttuaqqanut ilinniakkamik aallartitsisimapput.

- Ilinniartitaanernik iluarsaaqqinneq aggersoq peqataassaaq unammilligassanik pineqartunik iluarsiinissamut, pilersissallugillu ilinniartitaanerit ataqatigiissut aamma eqaatsumik aaqqissuussaasut, tunngaveqartut ukiuni 12-ini pisussaaffigalugu atuarnissamik, tungaviusussatut tamatuma kingorna ilinniagaqarnissamut, nunatsinni namminermi aammalu nunarsuatsinni sumiiffinni allani, iliuusissatut nalunaarusiami 100-nik quppernilimmi aallaqqaasiutitut erseqqissaatigineqarpoq.

Anguniagaq: Marloriaat

Meeqqat atuarfiini atuartut marloriaataasa 2024-mi ilinniagaqarnissaat anguniarneqarpoq.

Pingaarnertut anguniagaq ima nassuiaaserneqarpoq. Meeqqat atuarfianni naammassisartut 70 procentii inuussutissarsiutini piginnaaneqartitsilersumik ilinniagaqarsimasarnissaat 35-inik ukioqalinnginnerminni angusassagaat.

Anguniakkat anguniarlugit iliuusissatut nalunaarusiami suliniutit arlallit eqqaaneqarput.

Ullumikkut meeqqat atuarfiini ilinniartitsisutut ilinniagaqarsimasut 82 procentiupput. 2024-mi 92 procentinngorsimassasut, allassimavoq.

Suliniuteqarfissat qulingiluat

Pingaarnertut anguniakkat anguniarlugit meeqqat atuarfiini suliniutitut qulingiluat toqqarneqarsimasut:

• Ingerlaqqiffiusumik ilinniagaqartarnermut tunngavissat pitsaanerusut
• IT meeqqat atuarfianni
• Meeqqat atuarfianni inatsisinik nutarterineq (iluarsaaqqinneq)
• Pitsaassusissat aamma atuarfimmik ineriartortitsineq
• Ilinniartitaaneq aamma pikkorissaqqittarneq
• Ilitsoqqussaralugu oqaatsinik allamiullu oqaasiinik nukittorsaaneq
• Immikkut ittumik atuartitsineq aamma peqataatitsineq
• Atuakkiorfeqarnermut periusissiaq
• Kommunit atuarfiinik sanaartorneq

Ilinniartitaanermut Naalakkersuisoqarfiullu suliniutit arlallit iliuusissatut pilersaarutit pillugit paasissutissiivoq:

- Suut tamaasa ataatsikkut iliuuseqarfigisinnaanngilagut, taamaattumillu iliuusissatsinni suliniutitsinnilu tulleriiaarinissarput pisariaqarluni. Qularnaassavarput killiliussagut pitsaanerpaamik iluaqutigineqassasut, aamma amerlanerusut ilinniakkamik aallartitaminnik naammassisaqartarnissaat. Taamaattumik Ilinniartitaanermut Pilersaarut II tassaanngilaq pilersaarut iliuusissatsinnik tamakkiisunik imaqartoq, 2024-ip tungaanut naammassisimasassatsinnik, kisiannili paarlattuanik pilersaarutaalluni tasisuaartutut oqaatigineqarsinnaasoq, ukiumoortumik malinnaatitsiniarluni suliareqqinneqartartoq, iliuusissatut pilersaarummi allassimavoq nanginneqarlunilu:

Sunniutinik nalilersuisarnissaq

- Suliniutaasut sunniutaat, Naalakkersuisut anguniagaannut sanilliunneqarlutik ukiumoortumik nalilersorneqartassapput, nalilersuinerlu taanna tunuliaqutaralugu pilersaarummi nutarteraluni malinnaatitsisoqartarluni, Inatsisartut upernaakkut ataatsimiinneranni saqqummiunneqartartumik. Tamanna kiffaanngissusiliivoq unammilligassanik nutaanik naapigiaasarnissamut, ilisimasanik nutaanik ilanngussisarnissamut aamma pilersaarusiamik pisariaqarfiisigut naleqqussaasarnissamut, erseqqissaassutigineqarpoq.