Ilinniartitaanerit naalakkersuisoqarfimmit kinguarsarneqartut
Ilinniartitaanermut Naalakkersuisoqarfik pilersaarusiamut nammineq piffissaliussaminik malinninngilaq, 2017-imi novembarip qaammataani Niuernermik Ilinniarfik NI peqatiglugu aalajangersimagaluarput ilinniarneqarsinnaasunik marlunnik pilersitsiniarlutik
Ilinniarneqarsinnaasut taakku marluk aasaq manna NI-p kukkulluni pilersissimavai, ilinniagaqartussallu aqqaneq-marluk ilinniagaqarnissap aallartinngilaarnerani ilisimatinneqarsimapput ilinniagassaat taamaatiinnarneqartut. Naalakkersuisoqarfik akuliussimavoq, ilinniagassanut tunngaviusussat tamarmik suli inissinneqarsimannginnerat pissutigalugu.
Pele Brobergip § 37 naapertorlugu apeqqutaanut Ilinniartitaanermut Naalakkersuisoq Ane Lone Bagger akissuteqarami kanngunartuliap ilaa, tassa inuusuttut aqqaneq-marluk ilinniarnissaminnut akuerisaasimasut ilinniagaqanngitsoornissaat paasissutissiissutigaa.
Naalakkersuisoqarfik NI-lu 2017-imi novembarip qaammataani isumaqatigiipput niuernermut tunngasutigut ilinniagassat BA-t marluk ineriartortinneqassasut.
Aalajangiunneqarsimavoq tigussaasumik aalajangiisoqartinnagu inatsisitigut, aningaasaqarnermut ilinniarnermullu kinguneqaataasinnaasut qulaajarneqaqqaassasut, tamatumalu kingorna ukiup ataatsip qaangiunnerani, tassa 2018-imi suleqatigiissitaq pilersinneqassasoq.
Suliassamut nassuiaat amigaataasoq
Naalakkersuisoqarfiup nassuerutigaa – 2019-imi ukiaq manna – suliassamut suli nassuiaasiortoqarsimanngitsoq, tamannalu tunngavigalugu suleqatigiissitaq suli atuutsinneqalersimanngitsoq.
- Suliassap aallartinneqarnissaanut (suleqatigiissitat sulinissaannut) 2019-imi upernaaq piffissaliunneqarsimavoq, tassa allannguutaasinnaasut inatsisitigulluunniit tunngavissat nutaat UKA19-imi saqqummiunneqarnissaat siunertaralugu, Pele Brobergimut akissummi allassimavoq.
Ane Lone Bagger paragraf 37 naapertorlugu apeqqummut akissuteqarnermini allappoq, suleqatigiissitanik pilersitsinissaq suli pilersaarutaasoq. Akissateqarnerminili qaqugu pilersitsisoqassanersoq ilanngussimanngilaa.