meeqqat inuusuttullu

Ilinniartitaaneq pillugu misissuisoqarnissaa MIO-mit ujartorneqarpoq

MIO Ilinniartitaanermullu Naalakkersuisoqarfiup ataatsimoorlutik isumaqatigiissutigaat ataatsimeersuartitsissasoq, ilinniaqqiffinnut ingerlaqqinngitsoortarnerup pissutaanik ersersitsinissaq anguniarlugu

Ilinniartitaanermut Naalakkersuisoqarfik, Meeqqat Illersuisuat Aviâja Egede Lynge allallu ilinniartitaanermut attuumassuteqartut ICC’p ilinniartitaaneq pillugu ataatsimiititsineranut peqataapput. Ataatsimiinnermi issittumi ilinniartitaaneq sammineqarluni.

Ataatsimiinnermi meeqqat ilinniartitaanerlu eqqartorneqarput, matumanilu MIO aammalu Ilinniartitaanermut Naalakkersuisoqarfik assigiinngitsunik aallaaveqarlutillu eqqumaffigisaqarput.

- Meeqqat Ilinniartitaanerlu eqqartorneqartillugit taava ilinniarfinnut ingerlaqqinnissamut piginnaanerit suut pigineqarnersut isiginiarneqarsinnaapput. Meeqqat atuartinneqarnissaminnut ilinniartinneqarnissaminnullu pisinnaatitaaffeqarput, meeqqat atuarfiat naammassereerunikku ilinniaqqinnissaminnut piginnaaneqalersimasussanngorlutik, meeqqat illersuisuat Aviâja Egede Lynge tusagassiutinut nalunaarummi oqarpoq.

Misissuisoqarnissaa ujartorneqarpoq
Taamaattumik kisitsisit 2015-imeersut takutimmassuk meeqqat atuarfiannik naammassinnittut 70,8 procentiisa karaktererisimagaat F imaluunniit FX tamanna ajornartorsiutaavoq. Kisitsisillu misissoqqikkaanni takuneqarsinnaavoq atuartut 32,5 procentii atuartitsissutaasumi ataatsimi marlunniluunniit karakterilerneqarsimasut, atuartut 38,4 procentii atuartitsissutaasuni pingasuni amerlanerniluunniit karakterilerneqarsimasut.

- Assigiinngitsorpassuarnik patsiseqarluni piginnaaneriligassaralugit angunngitsoorneqartarsinnaapput, taamaalillutillu atuarfimmi atuartitsissutaasut tamaasa angusaqarfiginngitsoorlugit. Tamaattumik suut patsisaanersut paasiniarneqarnissaat pingaaruteqartorujussuuvoq, siusinnerpaamik iliuuseqarfigineqarsinnaanissaat anguneqarsinnaaniassammat, Aviâja Egede Lynge oqarpoq.

Ilinniartitaaneq pillugu ataatsimeersuarneq
Ilinniartitaanermut Naalakkersuisoqarfik ilinniarlutik aallartitsinngitsunik eqqartuigaangamik, taava taakkua piginnaaneri isiginiartarpaat.

- Tassanilu aamma misissussallugu pingaaruteqartuuvoq piginnaanernik amigaateqarnernut suut patsisaanersut paasissallugit, inunnut atugarisanut tunngasut il.il. imaluunniit ilinniagaqannginnermut taakkua tamarmik patsisaanersut. Takussutissaqarporlu inuusuttut taakkua akornganni piginnaaneqartoqartoq inuusuttullu ilinniarfiinut inuussutissarsiummilluunniit aallartitsinissaminnut piginnaaneqartoqartarmat. Ilinniaqqinnginnerannullu suut patsisaanersut nalunaarsorneqartariaqarpoq erseqqissaassutigineqarlunilu, meeqqat illersuisuat oqarpoq.

MIO Ilinniartitaanermullu Naalakkersuisoqarfiup ataatsimoorlutik isumaqatigiissutigaat ataatsimeersuartitsissasoq, patsisaasunik ersersitsinissaq anguniarlugu, taamaalillunilu MIO’p Ilinniartitaanermullu Naalakkersuisoqarfiup ilinniartitaanermik aaqqissuusseqqinnissaannut tassani paasisat ilaatinneqarsinnaanngussapput.

Powered by Labrador CMS