Ilinniarnertuunngorniarfimmi ilinniartitsisoq: Ajornartorsiut nassuerutigisiuk
Ilinniarnertuunngorniarfimmi ilinniartitsisup Aasianneersup, aviisimi Informationimi isumaliutersuummi danskit sanasut Aasianni akisussaasseqanngitsumik pissusilersornerannik isornartorsiuisup, aporfilersorneqalersinnaanini ilisimaavaa. Kisianni pissutsit pillugit oqallittoqarnissaa pisariaqartoq, taanna isumaqarpoq.
- Nipangersimaannarsinnaanngitsuuvunga, Mie Laugesen, danskit tusagassiorfianni Informationimi isumaliutersuummi, danskit sanasut ilaasa Aasiannut ilinniartoqarfiusumut tikikkaangamik pissusilersuutigisartagaannik uissuumminartumik sooq allassimanerminut taama naatsumik akissuteqarpoq.
Qaammatini pingasuinnarni Aasianneernermi kingorna, Mie Laugesenip najukkami inuiaqatigiinni pissutsinik illoqarfiup ilinniarnertuunngorfiani inuusuttunut peqqinnanngissorisaminik tikkuartuivoq.
- Soorunami una oqaluuserissallugu uanga eqqortuunerlunga aamma allat pissutsit pillugit isumaqatigissaneraannga isumaliutersuutigisimavara. Isumaliutersuutima saqqummernerata kingorna misigisimavunga amerlasuut isumaqataasut, Mie Laugesen Sermitsiaq.AG-mut taamma oqarpoq.
Amerlasuunit taperserneqartoq
Informationimi isumaliutersuummi Aasianni danskit sananasut akornanni pitsaanngitsumik ileqqoqarneq oqaluttuaraa, taassuma oqarnera naapertorlugu arnat inuusuttut ilinniarnertuunngorniarfimmeersut atornerluppaat, kunngitullu pissusilersorlutik, akisussaaffimmik qimarratiginnillutik kinguaassiutitigullu nappaateqalersitsillutik.
- Immaqa tikerlaajugama pissutsit tamakku oqaluuserinissaat sapinngilara. Imaanut ujaqqamik milorujussinissamut sapiissuseqarlunga misigisimavunga, qanorlu siaruartigiumaarnersoq takuniarlugu, inunnit ajornartorsiummik ilisarsisunit amerlasuunik allagarsivunga, taamaammat uniorpallaarsimagunanngilara, taanna oqarpoq.
Facebookimi eqimattani Aasiannut attuumassuteqartuni, najugaqartut arlallit aamma illoqarfimmi siornatigut sanasuusimasut ajornartorsiummik ilisarinnillutik isumaqataapput, kisianni aamma qujanartumik kikkut tamarmik taamatut pissusilersorneq ajortut oqaatigaat.
Ajornartorsiut nassuerutigisiuk
Akerlianik isornartorsiuimmut ilisarsinngitsoq tassaavoq KJ Greenlandimi pisortaq. Tamanna Sermitsiaq.AG-mut oqaluttuaraa. Taamatut pissusilersornerit akuersaarneqanngilluinnartut naqissusiivoq, pisorlu ataaseq sulisup soraarsinneqarneranik kinguneqartoq oqaluttuaralugu.
Kisianni taamatut qisuariarneq Mie Laugesenip isumaqatigivallaanngilaa.
- Pisortap peqqinnanngitsumik kultureqarneq nassuerutiginagu pisoq ataasiinnaq oqaatigimmagu isumaqarpunga uggornartuusoq. Siuttuunissaminut periarfissaqarpoq ajornartorsiullu aaqqillugu. Kisianni allaffigineqarnera naapertorlugu piviusut ilaat eqqorsimagikka, kisianni inuit saqqummernissartik qunugaat, paquminarmat, imaluunniit ammip qalipaataanik immikkoortitsisutut isigineqalernissartik ernumagigamikku.
Isumaliutersuutini ajornartorsiutip oqaasertalersornissaanut iluaqutaasinnaassasoq taassuma neriuutigaa, taamaalilluni immitsinnut qanoq pisarnitsinnut nikisitsisinnaammat.
- Ajornartorsiut nassuerutigisiuk oqaluuseralugulu, aamma taanna ilinnorpiaq imaluunniit suleqatinnut tunnganngikkaluarpat, taanna taama kaammattuivoq.