Ilinniarfinnut ingerlaqqittartut amerleriartut
2017-imi meeqqat atuarfianni soraarummeertut affaat sinnerlugit ukiut marluk ingerlanerini inuusuttunut ilinniarfimmik aallartitsisimasut Naatsorsueqqissaartarfiup kisitsisaataani takuneqarsinnaavoq. Inuusuttuararpassuit ilinniarfinnut ingerlaqqittarnerat Imak-ip siulittaasuanit nuannaarutigineqarpoq.
Meeqqat atuarfiannit naammassisut amerlasuut ilinniarfimmik aallartitsisartut amerleriarsimasut Naatsorsueqqissaartarfiup kisitsisaataani takuneqarsinnaavoq.
2017-imi meeqqat atuarfianni soraarummeertut akornanni 56 procentii ukiut marluk ingerlanerini inuusuttunut ilinniarfimmik aallartitsisimapput.
Atuartut amerlanersaat, 83 procentinik annertutigisut, ilinniarnertuunngorniarnermik aallartitsisimapput 17 procentillu inuussutissarsiornermi ilinniarnermik aallartitsisimallutik.
Nukappiaqqat ilinnialertartut
Kommunit malillugit immikkoortiterinermi Kommuneqarfik Sermersuumi meeqqat atuarfiini soraarummeertut inuusuttunut ilinniarfinni aallartissimasut amerlanerupput. Agguaqatigiissillugu Kommuneqarfik Sermersuumi 2015-imiit 2017-imut meeqqat atuarfiannit soraarummeersimasut 56 procentii soraarummeernerup kingorna ukiut marluk ingerlanerini inuusuttunut ilinniarfinni ilinnialersimapput.
Kommune Qeqertalimmi kiisalu Avannaata Kommuniani ingerlaqqittartut 48 procentiullutik appasinnerupput.
2017-imi meeqqat atuarfiata naammassereernerani niviarsiaqqat 59 procentii ilinniakkanut ingerlaqqittarput, nukappiaqqat 52 procentii ingerlaqqittartut. 2010-mili taamatut ingerlasimapput.
Taamaattoq nukappiaqqat meeqqat atuarfiannik naammassinnereernerup kingorna ilinniakkamik aallartitsisartut amerlassusaat niviarsiaqqat amerlassusaannit qaffariarnerusimavoq.
Pissutsit assigiinngitsut
Meeqqanut suliniuterpassuit pissutaaqataasut Imak-imi siulittaasup Birthe Møller Therkildsenip oqaatigaa.
- Meeqqanut suliniuterpassuit soorlu iPad-imut tunngasut, CSR Greenlandip aaqqissugai, Fonden for Entreprenørskabip suliniutai. Taakku kaammattuutaapput, allatut eqqarsarnermik inerisaaqataallutik. Suliniutit assigiinngitsorpassuit pissutaallutik ilinniarfinnut ingerlaqqittoqartarnera ilimagaara, Sermitsiaq.AG-mut oqarpoq.
Inuiaqatigiinni aamma ilinniartitaaneq pillugu oqallittoqartarnera iluaqutaasoq oqaatigaa.
- Meeqqat atuarfiata pitsanngorsarneqarnissaa oqallisigineqartuarpoq. Tamanna Inatsisartuni, kommunini, inuiaqatigiinni aamma kattuffinni assigiinngitsuni takusarparput.
- 2013-mi meeqqat atuarfiat nalilersorneqarpoq, tassani takuneqarpoq qanoq inissisimasoqarnersoq aammalu inuusuttut ilinniagaqaqqittalernissaat pisariaqartinneqartoq paasineqarpoq. Suliat assigiinngitsut suliarineqarneri maanna inerneri takusalerpagut, Birthe Møller Therkildsen oqarpoq.
Ilinniakkamik unititsisut
2017-mi meeqqat atuarfianni aallartittunit ilinniakkamik aallartitsigaluartut 109-it ilinniarnertik unitsiinnarsimavaat. Nukappiaqqat 49-t niviarsiaqqat 60-it.
2016-mi meeqqat atuarfianit naammaassisut, ilinniakkamik aallartitsisimagaluartut akornanni ilinniakkamik unititsiinnartut 104-pput. Nukappiaqqat 44-t niviarsiaqqallu 66-issit.